Footer

EDITORIAL: Panawenen a taliawen ti gobierno dagiti senior citizens

Agrag-o la ketdi dagiti senior citizens ditoy pagilian agsipud ta pinirmaan met laengen ni Pres. Gloria Macapagal-Arroyo ti RA 9994 wenno Expanded Senior Citizens Act 2010 ket mailaksiddan iti panagbayad iti 12% expanded value-added tax (E-Vat) kadagiti gatangenda a taraon, medisina, transportasion ken doctor’fees.

Ngamin, kasapulan pay laeng nga agprotesta dagiti senior citizens tapno madagdagus ti panangpirma ti Presidente iti gakat iti sanguanan ti ballaag ti Department of Finance a mapattapatta nga agpukaw ti gobierno iti manamnama a pamastrekanna a P1.6 bilion no saan a mabuisan dagiti gatangen dagiti senior citizens.

Nupay addan linteg idi 2003 a mangited iti 20% a diskuento kadagiti senior citizens kadagiti gatangenda a medisina, tagilako ken serbisio, napakatan dagitoy iti 12% E-Vat gapuna nga agtungpal laeng nga 8% ti diskuentoda.

Ita, sibubukelen a 20% ti diskuento ti senior citizens kadagiti gatangenna a medisina, kasapulanna a medikal ken dental supplies, diagnostic ken laboratory fees iti amin a pasilidad ti gobierno, kasta met iti pasahe kadagiti bus, dyipni, taksi, AUVs, shuttle services, ken uray dagiti lugan iti ere ken baybay.

Maited pay a benepisio ti marigrigat a senior citizen ti sibubukel a PhilHealth insurance coverage, libre nga anti-flu ken anti-pneumonia vaccines ken 5% a diskuento iti danum ken elektrisidad no la ketdi nainagan kenkuana ti metro ken makakunsomo laeng iti nababbaba ngem 100 kilowatt-hours iti elektrisidad ken 30 cubic meters iti danum iti binulan.

Maikkanda payen iti pribiliheo iti buis no aggianda iti otel, manganda iti restaurant, admission fee iti pagsinean, teatro ken dadduma pay a pagbuyaan iti kultura, pagpallailangan ken pagpalpaliwaan; kasta met iti serbisio iti puneraria ken tabon.

Sagudayen pay ti linteg nga umawat ti indigent a senior citizen iti P500 nga stipend iti binulan a rebioen ti Kongreso iti babaen ti koordinasion ti DSWD.

Kadagiti met establisimiente nga agsalungasing iti probiso ti linteg, dimmagsen ti maipakat a multada nga itan, manipud iti P10,000 agingga iti P50,000 wenno pannakaibalud iti saan a nakurkurang ngem makabulan ken saan a lumbes iti innem a bulan.

Kuna dagiti agilinlintegtayo a signipikante a lehislasion daytoy a linteg kas panangbigbig iti akem dagiti senior citizens iti kagimongan.

Iti met biangmi, rebbeng laeng ti gobierno a taliawen dagitoy a senior citizens agsipud ta kaadduan kadakuada ti nangipaay iti serbisioda idi kapigpigsaanda ken kabambannuaganda para iti panagdur-as ti opisina wenno ahensia ti gobierno a nagtrabahuanda. Dakkel ti pasetda iti panagdur-as ti pagilian. Ket ita ta kasapulanda ti pannaranay manipud iti gobierno, panawen metten nga ited daytoy kadakuada dagitoy kas panangbigbig ken panangraem iti nagapuananda iti panagdur-as ti pagilian.

Kasapulan ngarud ti madagdagus a pannakaaramid ti implementing rules and regulations para iti kabarbaro a linteg tapno naan-anayen a maipakat tapno maipaay metten dagiti benepisio kadagiti senior citizens.#