Footer

Operation Pacific Angel projects, binisita ti U.S. Chargé d’Affaires

LAOAG CITY – Tallo a humanitarian assistance projects ti Operation Pacific Angel 2010 ti binisita ni U. S. Chargé d’Affaires ad interim Leslie A. Bassett iti Laoag idi Pebrero 20.

Kadua ni Ms. Bassett ni Laoag Mayor Michael Fariñas ken dadduma pay a lokal nga opisial a nakipartisipar iti ababa a welcome ceremony a naangay iti 9:20 iti bigat a sinaruno ti panagpasiarda kadagiti Medical Civic Assistance Programs (MEDCAPs) a nangipaay kadagiti lumugar iti libre a primary care, family practice, dental services ken optometry iti Laoag City Hall Auditorium .

Nagturong da Ms. Basset, Mayor Fariñas, ken ti delegasion iti Caaoacan Elementary School tapno paliiwenda ti Philippine ken U.S. military personnel iti panagtrabahoda a mangtarimaan ken mangpasayaat iti pagadalan kas paset ti Engineering Civic Assistance Program (ENCAP). Karaman dagiti natarimaan dagiti atep ken panangikabil iti baro a bobeda, panangtarimaan kadagiti ridaw ken tawa, panangsukat iti barut ti elektrisidad ken tubtubo ken kabarbaro a pinta. Nairaman pay ti oras para iti maysa nga interbio ti media.

Kalpasanna, nagturong ti grupo iti Cabeza Elementary School tapno paliiwenda ti sabali a MEDCAP a mangipaay iti primary care, family practice, dental services ken optometry kadagiti lumugar a naituding iti tengnga ti aldaw.

Ti Operation Pacific Angel ket nagtipon a humanitarian assistance operation a panggepna ti pannakapasayaat ti kooperasion ti militar-sibilian iti nagbaetan ti United States ken ti Pilipinas. Iti panagtuloy ti U.S. humanitarian assistance iti Pilipinas kalpasan ti makadidigra a bagyo idi arintaposen ti 2009, aganay 50 a miembro ti U.S. Air Force ti nakitipon iti Armed Forces of the Philippines ken lokal a non-governmental organizations a nangipaay iti libre a medikal, dental, veterinary ken engineering assistance iti Ilocos Norte idi Pebrero 15-22.#

Comments are closed.