Footer

SALAYSAY: Kannawidan Ylocos Festival 2010: mangipasagepsep kinapateg kultura ken mangitandudo produkto ti probinsia (Tuloyna)

Iti maikatlo nga aldaw, naiyawat ti Living Treasure Award iti 60 a nataengan a natda nga agar-aramid pay laeng kadagiti nakainsigudan nga industria. Karaman ditoy dagiti agab-abel, agar-aramid iti makan, mainum, buneng, getteng, aglaga iti nadumaduma nga alikamen ken dadduma pay. Malaksid iti tropeo, impaayan pay ti gobierno probinsial iti P5,000 ti tunggal maysa kadagiti awardees kas insentibo tapno ituloyda ti ar-aramidenda.

“Masapul nga ipasagepseptayo ti kinapateg dagitoy nga industria kadagiti sumaruno a henerasion ta pasetdan iti kinailokanotayo,” kinuna ni Gov. Deogracias Victor Savellano.

Naiyalnag pay ditoy ti Tawid: The Living Treasures of Ilocos Sur a ginastuan ti gobernador ken sinurat da Norma Respisio, Maria Lourdes Ingel ken Jeffrey James Ligero ken inladawan da Jared Posion ken Teena Saulo.

Iti naangay a chess tournament, nagkampeon iti open division ni Nico Alisangco ti Sinait, Patrick Dulay ti Vigan City iti Junior Division ken John Daniel Lemi ti Vigan City iti Kiddie Division.

Karabianna, nagpabuya ti Bayanihan National Folkdance Company of the Philippines iti “Beyond Folklore” a nakaipakitaan dagiti tradisional a salsala ken kankanta iti nadumaduma a rehion ti pagilian.

Iti maikapat nga aldaw, maysa a libre a seminar para kadagiti mangisursuro iti Physical Education ti inangay ti Bayanihan. Adu dagiti insuroda a mabalin a maiyadal met kadagiti ubbing a naynay nga agpabpabuya ken makisalsalip iti sala.

Nagpakita met iti siglat dagiti nataengan iti fun run iti nasapa a bigat. Nupay makuna a nakapsuten dagitoy, inkarigatanda pay laeng ti umuna iti finish line iti sango ti kapitolio.

Dagiti met local horse jockeys ti nagsasalip iti malem a pannakaangay ti lumba ti kabalio iti Quirino Stadium. Manmano metten nga adda masangal a lumba ti kabalio isu nga adu nga umili a mailiwan itoy nga sport ti napan nagbuya iti pinnatapok dagiti kabalio.

Naitampok pay iti Kannawidan Ylocos festival ti pannakaiyawat ti Fr. Jose Burgos Awards kadagiti achievers ti probinsia. Daytoy ti kangatuan a pammadayaw nga ipaay ti probinsia kadagiti taga-Ilocos Sur a nakaaramid iti naisangsangayan ken nakaited iti dayaw para iti probinsia iti sangkapagilian ken ballasiw-taaw.

Indauluan ni Deputy Speaker Eric Singson dagiti napadayawan iti Fr. Jose Burgos Achievement Award. Kadua ni Singson a napadayawan idi rabii ti Enero 31 da Archbishop Ernesto Salgado, Arsobispo ti Nueva Segovia, para iti relihion; Dr. Fortunato Battad, President Emeritus ti Central Luzon State University ken Dr. Dorotea Filart, dati a presidente ti University of Northern Philippines iti benneg ti akademia; Architect Reymundo Florentino, maysa a mabigbig a teddek iti pannakapreserba dagiti daan a pasdek iti siudad ti Vigan ken immawat iti prestihioso a Golden Delphic Award iti 2nd International Delphic Games in Architectural Conservation Category sadiay Malaysia idi 2005 para iti photographic documentation ti Vigan architectural heritage, para iti benneg ti arkitektura; WBA Superflyweight champion Brian Viloria para iti sports; Viva Entertainment big boss Vic del Rosario Jr. para iti entertainment; Gawad SAKA Outstanding Corn Farmer Maximo Rabanal ken Gawad SAKA Outstanding Young Farmer Romeo Yapit para iti agrikultura.

(Adda tuloyna)

Comments are closed.