Footer

BANNER NEWS: 100 kilos marijuana bricks, kinumpiska dagiti polis-La Union

CAMP BGEN OSCARD M FLORENDO, San Fernando City – Uppat a lallaki ti inaresto dagiti polis ti San Gabriel, La Union idinto a kinumpiskada ti nasurok a 100 kilos a marijuana bricks bayat ti panagiwayatda iti checkpoint iti sanguanan ti police station iti parbangon ti Marso 5.

Inreport ni La Union Provincial Director Police Senior Supt. Noli G. Taliño ken ni Region I Police Director Chief Supt. Constante D. Azares, Jr., a naaresto da Bony T. Santos, 34, ken Francis Mogati, 22, agpada a residente iti La Trinidad, Benguet; ken Lindel Camilo, 23, ken Molitas Mariacos, 19, agpada nga agnaed iti Barangay Lon-oy, San Gabriel, La Union kalpasan a naduktalan dagiti polis nga indauluan ni San Gabriel Police Chief Senior Inspector Eduardo Sarmiento dagiti nasao a marijuana bricks iti compartment ti maris dapo a Toyota Hi-Ace van nga addaan plate number WSA 591 bayat ti insayangkatda a routine inspection iti agarup 1:30 ti parbangon ti Marso 5.

Segun iti report ni Taliño, pinasardeng dagiti polis ti lugan para iti routine inspection iti impasdekda a checkpoint ngem gapu iti nakadidillaw a tignay dagiti naglugan, inkeddengda a sukimaten ti compartment ti lugan ket ditoy a naduktalanda dagiti marijuana bricks nga agpateg iti P2.52 million.

Nakakumpiska dagiti polis iti 15 bricks a napagango a marihuana nga agdagsen tunggal maysa iti maysa a kilo, 33 nga agdagsen iti dua kilos, ken 20 one-kilo a rolio ti marihuana a naikabil iti tallo a sako, maysa a box ken plastic bag.

Sinaksian da Barangay Poblacion Sur Chairman Carlos Caweng ken Nestor Dususin ti Bombo Radyo La Union a residente met iti nasao a barangay ti pannakalukat ti compartment a nakaikabilan dagiti marijuana bricks.

Kinuna ni Sarmiento a nakaawatda iti tip manipud iti maysa a di nabigbig nga umili mainaig iti maibiahe a marihuana.

Kanaig daytoy, personal a pinadayawan ni Azares da Sarmiento ken ti sibubukel a polis ti San Gabriel gapu iti dayta a nagapuananda idinto nga impeksana ti pannakapnekna iti nasayaat a relasion ti polis ken komunidad iti nasao nga ili.

“Keep up the good work, and continue your good partnership with our stakeholders,” kinuna ti regional director.#

Comments are closed.