Footer

EDITORIAL: Sobra unay a panagpolitika

Saanen a rumbeng a maiyaleng-aleng pay ti dakkel a parikut a gubbuayen ti El Niño phenomenon ditoy pagiliantayo.

Rumbeng nga agtignay itan ti gobierno tapno malapdan ti dakkel a pamsaakan daytoy iti panagbiag dagiti umili ken iti ekonomia ti pagilian.

Kas panangiyunay-unaytayo iti kinagrabe daytoy a problema, dakamatentayo ti sagsagrapen tatta ti Cagayan ken Isabela gapu iti tikag a parparnuayen ti El Niño. Agsaning-in dagiti mannalon kadagitoy a lugar agsipud ta eppesen dagiti dawa dagiti pinagayanda gapu nagmagan ti pamataudanda iti danum a pagpasayakda iti kataltalonanda.

Ngem saan laengen a dagitoy a probinsia ti ramaramenen ti El Niño. Uray iti Kamindanaoan, mariknan dagiti umili ti epekto ti tikag iti panagbiagda. Bimmassit ti apit dagiti mannalon, ket no palausen ti manarita, di pay umanay a pangsilpoda iti angesda ti naapitda.

Uray iti Metro Manila, mariknada metten ti epekto ti El Niño gapu iti pannakaipakat ti rotating brownout wenno panagawan ti elektrisidad tapno makainut iti koriente ken iti danum nga usarenda.

Kapilitan a maipakat daytoy gapu ta makaalarman ken addan iti kritikal a tukad ti danum kadagiti dam a mangsupsuplay iti danum kadagiti agindeg iti Metro Manila. Maysa a mangimatmaton iti dam ti nagkuna a no awan pay ti tudo, nababanto unayen ti tukad ti danum ket saanton a makapasayak kadagiti kataltalonan kadagiti kaparanget a probinsia ti Metro Manila ken di pagduaduaan a maipakat ti water supply interruption kadagiti nadumaduma a paset iti Kamanilaan.

Pinadas payen ti turay ti nag-cloud seeding ngem napaay iti daytoy a wagas a pagpatudo gapu iti kaawan ti ulep.

No apay a nagtungpal a kastoy ti kagrabe ti situasion ket maitudo la ketdi ti pammabasol kadagiti agtuturaytayo. Sobra ngamin ti panagpolitika dagiti dadaulotayo gapu iti interes ken pagimbaganda.

Iti nabayagen a panawen, gumawgawawa dagiti kataltalonan kadagiti irigasion ngem sangsangkadilmut ti impaay ti gobierno. Imbes a gumatang kadagiti makinaria, mangipasdek kadagiti shallow tube wells ken water impounding projects, binay-anna lattan dagiti mannalon a kumaramut iti rengngat-rengngat a daga agsipud ta ad-adda ketdi a nagiray iti panagangkat iti sabali a pagilian kadagiti produkto a mangsulnit kadagiti pagkurangantayo a taraon a kas iti bagas ken mais ken uray dagiti nateng.

Maysa a pagilian nga agrikultura ti Pilipinas. Rumbeng koma a daytoy ti kangrunaan a pangituonan dagiti agtuturaytayo iti imatangda a saan ketdi a ti politika ken panagakup iti kuarta para iti kabukbukodanda nga umok. Kangrunaan a gapu a naisaadda iti turay tapno pagserbianda dagiti umili ken sumayaat met ti panagbiagda.

Ngem nakakalkaldaang nga isuda ti lumublubo ti panagbiagda idinto a mailumlom dagiti mannalon iti kapitakan.#

Comments are closed.