Footer

KOMENTARIO: Panawen a naariangga (Tuloyna)

Gapu iti daytoy aw-awaganda iti noise pollution, saan laeng a ti salun-at ti maapektaran no di pay mairaman a madidigra ti tabas ti ugali wenno natural behavior. Madadael ti physiological ken psychological a salun-at gapu iti dayta naariangga a tokar iti agingga iti dis-oras ti rabii wenno agingga iti parbangon wenno agpatpatnag. Ti masansan a pannakasinga ti turog iti rabii ti kangrunaan a taudan ti pannakadadael ti physiological ken psychological a salun-at. Pagangayanna, mariknan iti epektona iti pisikal a bagi. Tumpuaren dagiti saan a kinalikaguman a nasakit a kas ti stress ken hypertension. Sabali laeng ti tinnitus wenno panaglilipat ken ti depression. Taudan met ti adu a komplikasion dagiti nadakamat a sakit.

Agbunga dagitoy napartak a panagbalbaliw iti saan a nasalun-at a marikrikna. Bunga ti naariangga a panagbalbaliw dagiti sakit. Kasta met a saanen a maikaskaso ti ulimek ti sangakaarrubaan wenno sangkapurokan. Rimmimbawen ti para iti bukod laeng nga interes isu a nalipatan ti ikut a saguday ti sabali.

Napintas ti dumngeg iti musika a saan a naariangga. Napintas ti musika no kumutukot iti kaunggan. Napintas ti musika no ipaayna ti linak ken talna. Napintas ti musika a saan a makasinga. Ngem nalaad a denggen ti makasinga a musika.

Isu a kadagiti addaan iti naariangga a videoke, saan kadi a maiparbeng la unay a taliawen ken ipangpangrunada ti kinaulimek dagiti kaarruba. Maikanatad ti panangpanunot iti pagimbagan ti sabali a saan laeng ti bukod a bagi. Utoben koma a saan laeng a dakdakayo ti agindeg iti dayta a lugar. Ti panagparbeng ket aramid a maikanatad ti addaan naan-anay a nakemna.

Iti Section 5 ti Philippine Environment Code (wenno Presidental Decree 1152) mabasa a kastoy: “Appropriate standards for community noise levels shall be established considering, among others, location, zoning and land use classification.” Ti Executive Order 192 idi 1987 ti nangited daytoy a bileg. Ti Section 8 ti Philippine Environment Code ti nangited iti mandato iti National Pollution Control Commission (EMB-DENR itan). Kadagiti saanen a makaibtur iti ariangga, kamangen laeng ti National Pollution Control Commission, ket idatag ti kaso a kriminal maikontra iti asinoman nga aglasing iti Article 153 ti Revised Penal Code (public disorders). Kalaksidan itoy, posible pay ti panaglabsing iti ordinansa ti barangay wenno ti ili no addan naaramid a kastoy a linteg a mangisakit iti kinatalinaay ken ulimek iti kaadduan nga umili.#