Footer

Presio ti yellow corn, monitoren ti COOP-NATCCO partylist rep

SANTA CRUZ, Ilocos Sur – Indagadag ni COOP-NATCCO party list representative Jose Ping-ay, Jr. a di koma kiddawen dagiti mannalon ti nangato unay a presio ti yellow a mais tapno di mapilit dagiti feed millers nga agangkat iti sabali a pagilian.

Inlawlawagna a yantangay saan met unay nangato ti cost of production iti panagmula ti mais, nasayaaten ti magmagna a presio daytoy a produkto.

Iti agdama, agay-ayam iti P13.20 agingga P13.30 ti presio ti yellow corn.

“Posible nga agmantinir daytoy sakbay a sumangpet dagiti yellow corn a naangkat iti sabali a pagilian,” kinuna ti party list representative.

Kinuna ni Ping-ay a no agmantinir ti presio ti yellow corn iti bulan ti Marso, nasayaat daytoyen.

Innayonna a bimmassit ti mabusbos ni mannalon iti abono gapu ta iti napalabas, immabot ti presio ti Urea iti P2,100, ngem bimmaba itan iti P900.

“No ngumato ken mamentener ti presio ti yellow corn,” kinuna ni Ping-ay.

Madakamat ditoy a maysa ti Filipinas kadagiti innem a pagilian iti Asean a nagpirma iti pannakaipakat ti zero tariff kadagiti produkto iti agrikultura dagitoy a pagilian.

Segun ken ni Ping-ay, ti yellow corn ti maysa kadagiti nadakamat a liberalized agricultural commodity iti daytoy a free trade ket gapu iti daytoy, asinoman kadagiti mayat nga ag-import wenno ag-export iti daytoy a produkto ket awanen ti bayadanna a buis, nga agresulta iti nalaklaka a presio.

Nupay kasta, kinuna ni Ping-ay a no nangina unay ti presio ti mais iti Filipinas, agangkat la ketdi dagiti feed millers iti sabali a pagilian.

“Nasayaat laeng no agangkatda iti Brazil wenno Latin America ta agbuisda agsipud ta saan karaman iti tungtongan dagitoy a pagilian,” kinuna ni Ping-ay.

“Pudno a kayattayo ti nangato a presio ngem no nangato unay, idurdurontayo dagiti agar-aramid iti feeds a gumatang iti ballasiw-taaw,” kinuna ni Ping-ay.

Impasingked ni Ping-ay nga agtultuloy ti panangmonitorna iti daytoy a banag tapno saan nga agsobra ti volume dagiti imported a mais.

Iti napalabas a tawen, nagsobra ti naangkat a mais ket nagresulta iti panagsuek ti presio daytoy a produkto a nakalugian dagiti mannalon.#

Comments are closed.