Footer

7,000 babbai, nakipartisipar iti selebrasion ti International Women’s Rights Day

CANDON CITY. – Kinuna ti chairman ti Commission of Human Rights a bantayan ti opisinana dagiti tignay ti gobierno para iti pannakabigbig dagiti karbengan dagiti babbai ditoy pagilian.

Daytoy ti impatalged ni Commission on Human Rights chair Leila de Lima kadagiti rinibribu a babbai a nakipartisipar iti pannakarambak ti International Women’s Right Day a naangay ditoy a siudad idi Marso 8, 2010.

Iti panagsarita ni de Lima, kinunana nga immay ditoy siudad tapno ikampaniana ti women’s rights kas human rights idinto nga inggunamgunamna nga addan ti Magna Carta for Women ket masapul a maammuan met dagiti babbai ti karbenganda kas tao.

Ni de Lima ti kangrunaan nga speaker iti nasao a pasken a tinabunuan pay da Gwen Pimentel, anak ni Sen. Nene Pimentel, ni Deputy Speaker Eric Singson, Mayor Allen Singson ken dadduma pay nga opisial ti siudad.

Sumurok-kumurang a pito ribu a babbai ti nagparada manipud iti Stern Mall agingga iti Civic Center ditoy siudad tapno makipartisiparda iti nasao a pasken.

Dinayaw ti CHR chair dagiti babbai ditoy siudad gapu iti kinaaduda a nakipartisipar iti nasao a pasken idinto nga impatalgedna nga isuda iti CHR ti mangbantay iti Gender and Development Ombud tapno mapasayaat pay ti gender equality iti pagilian.

Kinuna ni de Lima a maysa ti Filipinas kadagiti daydayawen dagiti sabsabali a pagilian gapu iti pannakabigbig ditoy ti karbengan dagiti babbai.

Kabayatanna, kas paset ti Women’s Month Celebration ditoy siudad, naisayangkat ti Buntis Day idi Marso 9 a nakaipaayan ti libre a check-up, ultra sound, pop smear, blood sugar, blood typing, dental services ken dadduma pay a serbisio kadagiti masikog a residente ditoy siudad.

Tinawen a ramrambakan daytoy siudad ti aldaw dagiti babbai kas pannakipagmaymaysada iti sangalubongan a selebrasion para dagiti babbai.#

Comments are closed.