Footer

BANNER NEWS: 25,000 nga umili, natulongan ti RP Balikatan – US Marine officer

SINAIT, IlocosSur – Umaboten iti 25,000 nga indibidual ditoy Ilocos Sur ti natulongan dagiti napagtipon a puersa ti Armed Forces of the Philippines ken U.S. Military babaen ti RP-US Balikatan 2010 Shoulder to Shoulder for the Benefits of the People, segun iti dua nga opisial ti US. Marines ken Philippine Navy bayat ti naangay a seremonia iti Quimmallugong, Sinait idi Marso 11.

Kinuna da B/Gen. William Faulkner ti U.S. Marines ken Real Admiral Ramon Espera ti Philippine Navy a karaman dagiti naserbian ti grupo dagiti 750 nga ubbing iti Pias ken 600 iti San Jose, agpada a barangay iti Salcedo ken 500 iti Quimmallugong, Sinait; 10,000 nga umili ti natulongan iti medical ken dental missions a nakatamingan dagiti agduduma a sakit, pannakatsek-ap ti mata, dental ken naikkan iti libre nga agas; 3,000 ti natamingdagiti tarakenda nga animal iti veterinary section; ken 8,000 ti naikkan iti luplupot ken stuffed toys iti community relations.

Pinagyamanan ni B/Gen. Faulkner ti nabara a panangpasangbay dagiti Ilokano kadakuada bayat ti pannakaisayangkat ti Joint Military Exercises.

“Makunak a daytoyen ti kaannayasan ken kapintasan a Balikatan a naangay sipud nairugi daytoy,” kinuna ni Faulkner.

Pinagyamanan met ni Gov. Deogracias Victor “DV” Savellano dagiti amin a nakipaset iti Balikatan gapu ta adu dagiti naitedna a pagsayaatan ti probinsia.

“Iti laeng Salcedo ken Sinait ti nakaangayan daytoy iti probinsiatayo ket sapay ta inton maminsan, maisayangkatto met laeng daytoy iti sabali pay nga ili,” kinuna ti gobernador.#

Comments are closed.