Footer

EDITORIAL: Maysa a wagas ti panaggatang iti butos

Mabalin a sumabit ti maysa a kandidato para presidente gapu iti mapapati a panaggatangna iti butos, segun iti maysa a komisioner iti Commission on Elections.

Mismo a ni Election Commissioner Rene Sarmiento ti nagkuna a mabalin a sumabit iti panaggatang iti butos ni presidential candidate Manny Villar gapu iti ar-aramidenna a panagiwaras iti regalo (karaman ditoy ti scholarships) bayat kadagiti panagkampaniana ken angayenna a political rally.

“Iti babaen ti Seksion 261 ti Omnibus Election Code, karaman kadagiti maiparit nga aramid ti panagited iti kuarta wenno aniaman nga addaan pateg tapno mapaboran ti maysa a kandidato. Maawagan dayta iti panaggatang iti butos,” kinuna ni Commissioner Rene Sarmiento.

Segun ken ni Sarmiento, maysa met a wagas ti panaggatang iti butos dagiti scholarships nga ibumbunong ni Villar kadagiti political sorties ken political rally nga ang-angayenna.

Madakamat ditoy nga iti maysa a konsierto iti SM Mall of Asia iti Pasay City, mapapati a nagited ni Camille, anak ni Villar, kadagiti scholarships para kadagiti ubbing nga aggatad iti P70,000. Kasta met bayat ti panagkampaniana iti tiendaan ti Batangas City, mapapati a nagiwaras ni Villar iti sag-P20 kadagiti ubbing tapno igatangda iti kamote.

Mapapati pay a nagited ni Villar iti balay ken lote, kuarta, groseria ken scholarships kadagiti nakisalip iti “Wowowee” a programa ti telebision.

Ngem inkalintegan ti kampo ni Villar a saan a vote-buying ti panagiwarasna iti sag-P20 kadagiti ubbing agsipud ta saan a makabutos dagitoy, kasta met nga iti rock concert iti SM Mall of Asia, awan ti pasetna iti programa ken saan nga isu no di ti anakna a ni Camille ti nagited kadagiti scholarships.

Ngem madakamat ditoy a malaksid ken ni Villar, adda pay dagiti sabali a kandidato a mapapati a mangsalsalungasing iti daytoy a probiso iti Election Code.

Sagudayen ti Election Code a maibilang a panaggatang iti butos wenno panaglako iti butos ti “asinoman a tao a mangted, mangitanggaya wenno mangikari iti kuarta wenno aniaman nga adda pategna… tapno maawis daytoy wenno ti publiko nga agbutos para wenno kontra iti maysa a kandidato…”

Segun ken ni Sarmiento, kasapulan nga adda maipila a reklama iti Comelec tapno marugian ti inbestigasion mainaig iti mapapati a panaglabsing.

Awan la kadin ti maaramidan ti Comelec tapno mapasardeng dagiti kandidato nga agdadata ken awan amakda nga agsalungasing kadagiti paglintegan ti eleksion?

Di payen raemen dagitoy dagiti paglintegan ita ta kandidatoda pay laeng, anianto laengen inton addadan iti puestoda?

Saan koma nga urayen ti Comelec nga adda mangidatag iti reklamo santo agkuti. Maibilang dayta a kinalupoy iti sanguanan ti ipakpakita dagiti kandidato a dida panangipirpirit kadagiti paglintegan ti eleksion.

Ipakita koma ti Comelec nga adda durina a mangipakat kadagiti paglintegan iti eleksion.#

Comments are closed.