Footer

BANNER NEWS: Konperensia para nadalus, natalna nga eleksion, inggannuat dagiti obispo

CAMP BGEN OSCAR M FLORENDO – Kas paset ti tarigagay dagiti dadaulo ti simbaan a nadalus, natalna ken naannayas ti eleksion inton Mayo 10, indauluan dagiti obispo ti pannakabuangay ti maysa nga advocacy group iti pre-conference a naangay ditoy idi Marso 9.

Indauluan da Arsobispo ti Nueva Segovia ti Vigan City ken ni Bishop Artemio ti Diocese ti San Fernando City dagiti nakitaripnong a pakaibilangan da Atty. Noli Pipo, Region 1 Election Director; Tagudin Mayor Roque Verzosa; dagiti uppat a PNP provincial directors iti Region I; dagiti pannakabagi ti Armed Forces of the Philippines ken ti Parish Pastoral Council for Responsible Voting; dagiti dadduma a nangato nga opisial ti PRO1; ken dadduma pay nga stakeholders, a pakairamanan ti tri-media.

Ti Police Regional Office I (PRO1) nga indauluan ni Police Chief Supt. Constante D. Azares, Jr., Region 1 Police Director, ti nagsangaili iti konperensia a naisentro iti singasing a mangimbitar kadagiti lokal a kandidato a makipartisipar iti maysa nga aldaw nga espiritual a rekoleksion a tampokan ti panagpirma iti katulagan ti kappia.

Karaman dagiti napagpapatangan ti pannakainbolbar ti tri-media iti pannakairakurak ti impormasion mainaig iti peace covenant ken dadduma pay a napateg nga aktibidad; ken iti pannakabuangay ti maysa nga advocacy group a mangmonitor iti pannakatungpal ti katulagan ti kappia.

Kinuna ni Azares a dakkel ti moral nga inpluensia dagiti dadaulo ti relihion, nangruna dagiti obispo, idinto nga inladawanna ida a “kangrunaan a kaduatayo iti pannakaisangbay ti kappia ken urnos iti masungad a political exercise.”

Kinuna ni Archbishop Salgado a trataren koma amin dagiti maseknan ti peace advocacy a kas panangaramid iti pagayatan ti Dios. “Ar-aramidentayo daytoy para ken ni Kristo, ipuestotayo ni Kristo iti sentro daytoy a gannuat,” innayonna.

Inyunay-unay ni Bishop Rillera ti agtultuloy nga adbokasia a pannakaidur-as koma ti kappia ken urnos iti rehion .

“Agtalinaedtayo koma a bihilante, saan laeng a kabayatan, ngem uray iti nagbaetan ti panawen dagiti eleksion,” kinunana.

Kabayatanna, inkari dagiti partisipante ti pammatalgedda iti pannakabuangay ti grupo ti adbokasia para iti HOPE 2010.

“Maysa a pammatalged ti panagpinnirma iti katulagan ti kappia ken rekoleksion/retreat a saan nga agsina dagiti kararag ken tignaytayo ken napigsa ti inpluensiada iti masungad nga eleksion,” kinuna ni Azares.#