Footer

KOMENTARIO: Isyo ti nagbebeddengan

Rumbeng la unay a malawlawagan a nalaing ti isyo ti nagbebeddengan ti probinsia ti Ilocos Sur, Abra ken Mountain Province tapno maammuan ti pudpudno nga akinsakup. Napateg la unay a maammuan ti probinsia a pudpudno nga akinsakup daytoy maaw-awagan iti Ampis area tapno saan a puon ti pagriririan ken tapno maisardeng ti panagtitinnudo ken panagpipinnabasol mainaig kadagiti saan a nasayaat a mapaspasamak iti nagbeddengan.

Maysa a naipangruna a gapu a kasapulanen a malawlawagan ti pudpudno nga akinsakup iti pagbeddengan agsipud iti problema ti insurhensia wenno illegal nga aktibidad.

Daytoy ti gapuna a rumbeng laeng a malawlawagan ti isyo no sadino a talaga ti pagpatinggaan ti masakupan ti probinsia ti Ilocos Sur gapu ta masansan a mapagbiddutan ti probinsia a mangkonkonsintir iti insurhensia. Ngamin, adda dagiti report a masansan ti sighting dagiti kabusor ti turay a mapapati a nawaya nga agdakdakiwas iti nagbeddengan ti Abra ken Ilocos Sur.

Kasta met nga adda dagiti napasamak iti kallabes a rupak iti nagbaetan dagiti militar ken dagiti kameng ti New People’s Army iti lugar a mapagsusupiatan no ania a probinsia ti akinsakup.

Ti makadakes, masansan a maipit dagiti sibilian kadagiti rinnupak. Wenno saan, mapagbiddutanda wenno mapagsuspetsaan a kameng ti subersibo nga elemento, makipagsimpatia, wenno informer. Narikut ti sasaaden dagiti sibilian a maip-ipit ken maliplipit iti mapasamak nga engkuentro iti nagbaetan dagiti soldado ti turay ken dagiti kameng ti New People’s Army. Ti rigatda, awan ti masnop a pagpatulonganda agsipud ta adda kuestion no ania a probinsia ti akinsakup kadakuada.

Ti makadakes, gapu iti kaadda dagitoy a sibilian iti pagbeddengan, kasla nakareppet ti ima dagiti agtuturay dagiti maseknan a probinsia a mangiwayat kadagiti addang tapno masalakniban dagitoy nga umili gapu iti kaawan ti nalawag a pakatuntonan no agindeg dagitoy iti sakup ti iturayanda a probinsia.

Makunami ngarud nga umno la unay ti inaramid ti municipal council ti ili ti Quirino, Ilocos Sur iti panangidatagna iti resolusion iti provincial board tapno masolbar koma iti kabiitan a panawen ti problema ti nagbebeddenganda iti ili ti Tubo, Abra ken ti Besao, Mountain Province. Iti indatagna a resolusion, inrengreng dagiti agtuturay ti Quirino a kasapulanen a masolbar ti problema iti nagbeddengan agsipud ta kanayon nga isu ti mapagbiddutan a konsintidor iti tri-boundary. Iti biang dagiti agtuturay ti Quirino, saan a maikanatad daytoy nga alegasion ta makaited iti saan a nasayaat nga impression iti napintas a nagan ti ili a Quirino. Saan a maitutop iti ladawanna a naulimek ken natalna nga ili.

(Maigibusto)

Comments are closed.