Footer

Panagibales: manto a mangkullaap iti panunot (Umuna iti dua a paset)

Nabartek iti maysa a malem ni Angkuan a naggawid manipud iti maysa a pasken. Iti sungaban ti purokda, nalabsanna ti dua a lalaki a dimsaag iti kalesa. Dagiti suspetsa a nangpatay iti kabsatna a ni Tony idi kanikalima a tawen.

Nagtupa ti sangi ni Angkuan. Nabayag a naglemmeng dagiti dua kalpasan ti pammapatay. Nadismis ti kaso maikontra kadakuada agsipud ta awan ti timmakder a saksi. Ita, nagsublin dagiti dua. Ipagarupda siguro a naikupinen ti kaso maikontra kadakuada.

Ngem kemkemkemen pay laeng ni Angkuan ti pungtot iti barukongna. Aglalo ita ta nalaokan iti arak ti darana.

Apagserrek ni Angkuan iti balayda, linuktanna ti lakasa a nakaidulinan ti paltogna. Inkasana sana kinalbit. Saan a naglati ti paltog ta masansan a dalusanna.

Impakbona ti karton a naglaon iti bala sana kinargaan ti magasin ti paltog.

Naglagaw ni Iniang nga asawana idi makitana ti ar-aramidenna.

“Apay dayta, Angkuan?” sinaludsod ni Iniang.

“Patayek ida! No pinatayda ti kabsatko, patayek met ida! Kimat laeng ti di mabales!” inradies ni Angkuan.

“Agpanunotka koma, Angkuan. Saan a dayta panagibalesmo ti panunotem no di ti masakbayan dagiti annakmo!” kinuna ni Iniang.

Ngem, nalaokanen iti arak ti dara ni Angkuan. Saanen a simrek kenkuana ti panagpakaasi ni Iniang nga asawana.

“Ita met laeng, ipaalnawko ida iti kataltalonan! kinuna ni Angkuan.

Nagkalumbitin ni Iniang ken dagiti annakna nga agtawen iti uppat ken dua iti takiagna. Nagrungaab dagiti ubbing. Ngem inwalin ni Angkuan ida. Uray la nagranatrat ti kawayan nga agdan iti panagdalagudogna nga immulog..

Insalikad ni Angkuan ti paltog idinto a sinurotna ti bit-ang nga agturong iti sungaban ti purok a nakasirpatanna kada-giti nangpatay iti kabsatna. Nalabsanna dagiti kasinsinna iti tianggi ni Baket Kulasa. Dagus a simmurot dagitoy idi inayabanna ida.

Kabayatanna, timmaray ni Iniang iti balay da katuganganna a lalaki nga adda laeng iti dayaen ti balayda. Dinagdagus ti lakay ti immulog sana dinagas ti kaanakanna a polis.

Ngem naladawen idi makagtengda iti sungaban. Nadalupon ti dua a suspetsa a nangpatay iti kabsat ni Angkuan iti paraanganda, nadigosda iti bukodda a dara.

Uray la nagkusaykusay ni Iniang iti leddaangna…

Naatake met ti katuganganna a lalaki ket saanen a nabigatan iti ospital a naka-itarayanna.

Tiniliw dagiti polis ni Angkuan. Naibalud. Adda timmakder a saksi kontra ken ni Angkuan. Kalpasan ti makatawen, nasentensiaan ni Angkuan a mabalud iti tungpal biag. Nababbaba ti sentensia dagiti dua a kasinsinna.

Idi maipan ni Angkuan iti Munti, nakalua idi awan ti namalubos kenkuana. Nakarikna iti panagbabawi iti inaramidna ngem ania pay ti maaramidna? Nautobna nga awan ti mamaay ti panagibalesna. Awan ti naitedna nga imbag iti pamiliana, nangruna iti masakbayan dagiti annakna.

(Maigibusto)

Comments are closed.