Footer

SALAYSAY: INDAYON NI LAGIP: Nagkurusan (Tuloyna)

Ngem idi agdakiwas ti dakulap ni Rollie iti bagik, kellaat nga immibbetak.

“Saan, Rollie!” nakunak.

Kasla awan ti nangeg ni Rollie. Immirut ketdi ti arakupna sana diningpil ti bibigko.

Mangrugi manen a mayagus ti riknak. Ngem kasla nasinitak idi immuneg ti ima ni Rollie iti brak.

Inwalinko ti imana saak timmakder.

“S-saanko a maitured….” nakunak.

“Ngem agayan-ayatta, saan?” kinuna ni Rollie idinto a pinetpetanna ti imak.

Linapsutko ti dakulapko.

“Di la mabalin nga agsublikanton iti sabali nga aldaw?” kinunak.

Minatmatannak ni Rollie. Nagtung-ed idi agangay.

“Pakawanennak no nayagus ti riknak. Ay-ayatenka ngamin,” nakunana.

Diak sinungbatan.

“Baliwakto ngaruden ti agpasiar,” kinuna ni Rollie sakbay nga immulog.

Idi makapanaw ni Rollie, nagpakniak iti kuartok. Nagsangitak. Binabalawko ti bagik no apay nga intulokko a mayagus ti riknak.

Ngem kasla marikriknak pay la ti apuy nga imbati ni Rollie iti nadumaduma a paset ti bagik a nagdaliasatan ti dakulapna. Napakidemak ta adda pay la ti sam-it ti agekna iti bibigko.

Ngem inkarik iti bagik a birhenak a dumatag iti altar. A sako la ited ti kinababaik iti lalaki nga ay-ayatek kalpasan ti kallaysa.

Kastoy gayam ti agayat! Isu met la nga adu ti maikulbo gapu iti dida pannakateppel a mayagus ti riknada!

Ngem nagbalawak ta dua a lawas a saan a simmarungkar ni Rollie. Saan met a timmawag nupay naipakadaywan kenkuana a tunggal rabii nga agteks kaniak sakbay a maturog iti rabii.

Alimbasagennak iti iddak. Agsisimparat dagiti pampanunot a simmangbay kaniak. Nagpauyo kadi ni Rollie gapu iti diak panagpabus-oy kenkuana? Ay-ayatek ni Rollie. Diak la ketdi maibturan a mapukawko. Ngem no pudno nga ay-ayatennak, raemenna koma no diak maited ti kalikagumna kaniak.

Idi awan latta ti tawagna kaniak, siakon ti immawag kenkuana.

“Hello, Rollie, kumusta?” nakunak.

“Sino daytoy?” naklaatak ta babai ti simmungbat kaniak.

Dagus a kinanselak ti tawag. Agkakapsutak a nagtugaw. Insukatnakon ni Rollie? Saan a maaramid dayta ni Rollie, nakunak iti nakemko.

Kalpasan ti maysa nga oras, nagkikiring ti selponko. Ni Rollie.

“Timmawagka kaniak?” inamadna.

“Wen,” insungbatko. “Sino diay babai a simmungbat?”

“Kabagisko. Nabatik ngamin ti selponko ta adda napanak. Imbagana tattay simmangpetak. Apay a timmawagka?”

“Dua a lawas ngaminen a dika nagteks wenno timmawag,” nakunak. “Amangan kunak no nagsakitka…”

“Adda ngamin inasikasok,” nakuna ni Rollie. “Napanak nagaplay a mapan agtrabaho iti ballasiw-taaw.”

“A-agabrodka?” nakunak. “Adda gayam panggepmo a pumanaw ditoy lugartayo ngem dinak pay pinakaammuan…”

(Adda tuloyna)

Comments are closed.