Footer

Balikbayan napapatay iti videoke bar

VIGAN CITY – Maysa a balikbayan ti napapatay iti maysa a videoke bar ditoy siudad iti rabii ti Marso 22.

Iti report manipud iti polis ditoy, dua a lalaki ti nangpaltog ken ni Antonio Ragasa y Rabot, 24, naasawaan, residente ti Barangay Paratong, Sta. Catalina, Ilocos Sur, iti uneg ti Cool Spot Videoke Bar iti Barangay 2, Amianance ditoy idi agarup 10:30 ti rabii ti Marso 22.

Kinuna ni Vigan City Deputy Chief of Police, Police Chief Inspector Maximo Taclas a sakbay ti pammaltog, naguray dagiti suspetsa iti nasao a videoke bar babaen ti panaginumda iti saggaysada a bote ti serbesa.

Idi sumangpet ti biktima ken dua a kaduana iti videoke bar, binayadan dagiti dua ti ininomda, inasitgan ti maysa ti biktima sana pinaltogan iti namindua.

Natay a dagus ti biktima gapu iti sugatna iti muging ken tengnged.

Nakarekobre dagiti inbestigador iti dua a kapsula manipud iti cal. 45 iti nakapaltogan ti biktima.

Mapapati a naglugandagiti di nabigbig a suspetsa iti motorsiklo iti panaglibasda iti saan nga ammo a direksion.

Kinuna ni Taclas a naggawid ti biktima tapno adda asikasuenna a problema.

Saan a dinakamat ti deputy COP no ania ti problema. Kasangsangpet ti biktima manipud iti Rome idi Marso 8.

Agtultuloy ti panagimbestiga dagiti polis iti pammapatay.#

Comments are closed.