Footer

EDITORIAL: Nalawan ti anniniwan a sinakop ti narcopolitics

Ti pannakirupak iti maiparparit a droga ti kapepeggadan iti amin a dangadang iti gimong. Adu dagiti kalabanmo ngem dimo maibuksilan ti kinaasinoda. Kapepeggadan pay a suraten ken sukisoken ta kayariganna ti panangiyaddang ti maysa a saka iti tanem. Ngamin, saan a masinuo dagiti ima ti linteg ti kinaasino ti makin-anniniwan  nupay ammo lattan a nasaknap daytoy gapu met laeng kadagiti matiltiliw a  naglabsing. Narigat a mapungtil ti sanga, mapaliiw ketdi nga ad-adda a rumangpaya.

Mapaspasamak daytoy gapu iti  nalabes la unay a panagkunniber. Adu dagiti rinuker iti gimong, kas dagiti naisungsong iti bisyo nga umili,  dagiti birkog a pannakabagi ti linteg, dagiti buklis a maimpluensia a tattao, karamanen dagiti itta nga adda iti gobierno.

Ita a tiempo ti eleksion, madlaw unay dagiti addaan iti kapet iti nasao a gimong gapu iti nalaus unay nga inda panaggasto iti panagkampaniada. Ad-adun ti nagastoda ngem ti kitaenda a sueldo bayat ti panagtakemda. Posible ti alegasion nga adda pannakairamanda iti direkta ken indirekta iti droga iti daytoy panagpayagpagda bayat ti kampania. Ta saan a siwawaya nga agtignay dagiti gamat itoy no awan ti maimpluwensia a tao wenno protektor ti nasao a mangidadanes iti gimong nangruna kadagiti agtutubo.

Kumbinsido ti National Bureau of Investigation (NBI) nga agliklikos a pumaypayagpag iti pagilian ti narco-politics ngem narigat nga itudo no asino dagiti politiko a karaman daytoy a nalimed nga operasion ta saan a bastabasta maitudo lattan no asino dagiti umaw-awat iti drug money wenno protektor. Ngem ammoda nga adda dagitoy, agsipud ti kaadda dagiti matiltiliw  a drug personalities.

Sumagmamanon dagiti politiko ti naaresto mainaig iti droga kas iti bise mayor iti probinsia ti Quezon ken maysa a konsilor iti Metro Manila. Ngem babatting laeng nga ikan dagitoy. Kadagiti bigtime syndicate, pinagbalinda laeng a transit point ti pagilian – maiserrek wenno mapartuat ti droga ditoy, santo met la maiwaras kadagiti pagilian a paggunggunayan dagiti gamatda.

Maysa pay a rason ti idudur-as daytoy maiparit nga industria ti panagraira dagiti shabu tiangge kadagiti siudad. Agdadata, saanen a maiduldulin wenno mailimlimed ti panaglakuan kadagitoy a narco community.  Nupay adun dagiti dinadael dagiti pannakabagi ti linteg, adu pay dagiti saan a magargaraw ken dagiti maipasngay a sabali pay nga umok.

Ti rigatna, kas transit point, pasaray maaramat payen dagiti OFW a kas drug mules. Sabali pay a modus operandi ti pannakiasawa ti ganggannaet iti Pilipina a pangabbongda iti kinaasinoda, kas ken ni Ghulam Sheik a natiliw iti Baguio.  Iti Benguet, Tuguegarao, La Union, Dagupan, Abra, Cagayan ken dadduma pay a lugar ti pagrairaan ti gamat ti grupo ni Sheik.

Napeggad ti narco-politics agsipud ta iti droga ti pagtaudan ti gastuen dagiti politiko. No di mapugipog, agpeggad a maitulad ti Pilipinas kadagiti nasion a yan ti drug cartel a kas iti Columbia iti South America, Afganistan, ti Golden Triangle iti Indochina (Myanmar, Laos, Vietnam ken Thailand); ti Golden Crescent a buklen ti Afghanistan, Iran, ken Pakistan ken dadduma pay a nasion a gagangay laengen pakapartuatan dagiti makailuod a droga.

Nasken la unay ti panagsiput,  panagridam ken panagpaliiw kadagiti mapaspasamak iti komunidad. Kangrunaanna, napingpinget koma ti kampania ti gobierno ken ti kapolisan tapno mawara daytoy a mangiluod iti masakbayan saan laeng dagiti agnaed no di pay ti masakbayan ti pagilian. (JMAJr.)

Comments are closed.