Footer

KABSAT, binigbig Liga dagiti Probinsia

VIGAN CITY, Ilocos Sur – Binigbigen ti Liga dagiti Probinsia iti Pilipinas ti Kakailian nga Agnaed iti Barangay Sangsangkamaysa nga Agrang-ay Tayo (KABSAT), daytoy ti impakaammo ti gobernador ditoy probinsia itay nabiit.

Kinuna ni Gov. Deogracias Victor Savellano a rinekognisar ti League of Provinces of the Philippines (LPP) ti KABSAT Outreach Program gapu ta nakitada a dakkel ti maitulong ti nadakamat a programa iti pannakailung-aw dagiti umili manipud iti kinapanglaw.

Kanaig daytoy, dua manen nga ili a pakairamanan ti Santa ken San Ildefonso, Ilocos Sur ti sinerbian ti KABSAT idi Marso 18 ken 19, 2010.

Immuna a dinanon ti KABSAT  ti Santa, Ilocos Sur idi Marso 18 ket naiyawat ti nadumaduma a ramit ti talon kas iti corn sheller, kuliglig, water pumps, generators ken hose; bangka a de motor ken iket para iti sigay; medical kits, kitchen utensils, garden tools, tents, tugtugaw, sarukod para kadagiti senior citizens, encyclopedia, tsaleko para kadagiti barangay tanod ken tulong a pinansial a sag-P5,000 tunggal maysa kadagiti 26 a barangay ti Santa.

Iti sumuno nga aldaw, tallo a farm tractors, medical kits para BHWs, sarukod para kadagiti senior citizens ken P15,000 a financial assistance tunggal maysa kadagiti 15 a barangay ti naipaima iti San Ildefonso.

Rinuk-atan pay ni  Savellano ti P5 milion a pondo para iti pannaka-rechannel ti Bantaoay river.

Nataming dagiti sakit dagiti umili iti dua nga ili babaen ti medical ken dental mission a paset pay laeng ti KABSAT program idinto a dimmalan iti panagsanay dagiti barangay officials, volunteer barangay workers ken agtutubo babaen kadagiti seminars nga insayangkat dagiti opisina ti kapitolio ken line agencies a nakipaset iti programa.

Impanamnama ni Vice Mayor Jesus “Popoy” Bueno II  ti agtuloy  a suportada kadagiti napipintas a gannuat ti gobierno probinsial a kas iti KABSAT.

Kinuna met ni Vice Mayor Amante Purisima nga apaman a mairingpas ti rechanneling ti Bantaoay river, maliklikanton ti pannakalayus dagiti barangay a dalanan ti karayan kas iti Busiing Norte, Busiing Centro Sur ken Gungogong.#