Footer

KOMENTARIO: Isyo ti nagbebeddengan (Tuloyna)

Kas sungbat ti arungaing ti Quirino, impanamnama ni Gobernador Deogracias Sevillano ken dagiti kameng ti hunta probinsial a makiumanda kadagiti maseknan nga opisial kadagiti kaparanget daytoy a probinsia.

Ngem saan koma nga agpatingga lattan iti pannakiuman. Kinapudnona, nabayagen daytoy a problema ket iti kallabes, adda metten panagpapatang dagiti napusgan a pannakabagi dagiti maseknan a probinsia ngem nakaladladingit laeng ta awan ti nagtungpalanna. Agingga ita, maysa pay laeng daytoy a problema a mapaliiw nga agbalin a siit iti nasayaat koma a panaglilinnangen dagitoy a probinsia.

Saan laeng koma a basta makiuman ti aramiden dagiti agtuturay dagitoy a probinsia no di agtugawda koma iti maymaysa a lamisaan tapno adalenda a nalaing ti rumbeng a masurot a pangsolbar ti parikut ti nagbebeddengan ken dagiti parikut a sangsanguen iti Ampis Area. Maitutop la unay ti panagkaykaysa ken panagmaymaysa kadaytoy a panggep.

Maysa a third class municipality ti ili a Tubo ken addaan iti distansia a 55 a kilometro manipud iti Bangued, ti kapital ti probinsia ti Abra. Manipud ditoy kabesera, magteng ti Tubo babaen ti idadaliasat kadagiti ili ti Penarrubia, Bucay, Manabo ken Luba. Mabalin met ti dumalan iti Candon-San Emilio road, wenno iti Tagudin-Quirino road. Mabalin pay ti dumalan no kayat sadiay ili ti Besao, Mountain Province.  Addaan ti ili iti sangapulo a barbarangay. Kas maibasar iti sensus idi 2007, agdagup ti populasionna iti 5,558 iti 902 a balbalay.

Fifth class municipality ti ili ti Besao, Mountain Province. Iti kaudian a naisayangkat a  sensus, agdagup ti populasionna iti 7,295 nga agindeg iti 1,735 a pagtaengan. Nalatak ti ili a kas ayuyang ti nalatak unay a Philippine Serpent Eagle. Addaan ti ili iti sangapulo ket uppat a barbarangay.

Fourth class municipality met ti ili ti Quirino, Ilocos Sur. Angaki ti sigud a naganna. Nasukatan daytoy iti agdama a naganna kas pammadayaw iti maikanem a presidente ti Filipinas, daydi Elpidio Quirino, nga anak ti probinsia. Addaan iti siam a barbarangay, ken addaan iti 7,866 nga agindeg iti 1,348 a pagtaengan.

Maysa a dakkel nga epekto ti saan a nalawag a nagbeddengan ti pannakabingay dagiti agindeg no ania a lugar ti pagbutosanda no tiempo ti eleksion. No pudno ti damag, nabingay dagiti agindeg iti boundary a di pay nalawag no sakup ti Quirino, Ilocos Sur wenno ti Besao, Mountain Province, no sadino ti pagbutosanda. Mapapati nga adda agbutos iti Besao idinto a dagiti dadduma met, nagbalinda a botante iti Ilocos Sur.

Saan koma ngarud a barengbarengen ti isyo nga indatag ti konseho munisipal ti Quirino iti hunta probinsial no di ket ikonsidera a kas serioso a saritaan ta sakupenna pay daytoy ti kinabaknang ti lugar. Rumbeng laeng a masolbar iti kabiitan a panawen tapno maipaay kadagiti agindeg iti naan-anay a suporta ken tulong para iti pannakatagiben ti linak ket kappia tapno ad-adda pay a dumur-as dagiti agindeg.

Agingga iti saan a nalawag no ania a probinsia ti akinsakup iti mapagsusupiatan a boundary, saan a maited kadagiti agindeg iti tumutop a serbisio a rumbeng laeng nga ited ti ili wenno probinsia nga akinsakup kadakuada.

Masolbar koman daytoy a problema ti nagbeddengan tapno saan a maikapis dagiti agindeg kadagiti mapagsusupiatan a nagbebeddengan.#

Comments are closed.