Footer

Ti tagapulot iti kultura ni Ilokano (Maudi iti dua a paset)

Tagapulot kontra puraw nga asukar

Ti tagapulot ket napno kadagiti mineral nga adda iti unas kas ti calcium, phosphorous, iron, potassium ken sodium. Segun kadagiti panagsukisok a naisayangkat iti kallabes, natakuatan nga awan ti calorie ti puraw nga asukar.

Tapno  masigurado ti kalidad ti tagapulot a mapan iti Asia, Europe ken North America, nagaramid dagiti agsuksukisok iti Departament of Science and Technology Industrial Technology Development Institute iti standardized muscovado production process. Ngamin, iti survey nga inaramidda, natakuatanda a saan a makapasa iti international requirements  dagiti agparpartuat iti tagapulot iti Pilipinas gapu iti kinaadda ti dam-eg, microbial load, ken kolor, ken dadduma pay iti produkto. Maymaysa laeng iti intero a pagilian ti nakarehistro iti tallo nga international muscovado(tagapulot) certifying bodies, daytoy ti nakabase iti Negros Occidental.

No idilig iti moderno a wagas, 50 porsiento laeng ti kinasayaatna ti tradisional a panagpartuat ti tagapulot nga ar-aramiden dagiti dandani amin nga agar-aramid. Isu a kasapulan a makontrol ti panagpartuat tapno maikkat ti rugit a mapan iti tagapulot tapno natalged a makan. Kasapulan pay a masurot ti husto a panagpartuat a pakairamanan dagiti trabahador, dagiti pasilidad ken ti pasdek, dagiti ramit ken aramaten, paggapuan ti danum ken ti wagas ti panagaramid.

Kalidad, mangrugi iti talon

No agpukan kadagiti unas, masapul nga ipuon tapno maala amin nga asukarna. Saan a nasayaat ti panagpuor ta dadaelenna ti unas, ken mapukaw ti 20 porsiento a kinadagsenna, kasta met ti tubbogna. Dagiti madadael ket pabassitenna ti kapasidad ti panagpartuat, ken ti asukar a maala. Masapul nga ispreyan iti napudot a danum dagiti unas a naani a saan pay a naluto iti 48 oras ken putden  dalusan, ken idulin dagiti unas a nasayaat.

Tapno makontrol ti kalidad ti tagapulot, imbaga ti ITDI a masapul nga adda ti 115-120 degrees Celsius ti kapudot ti panagluto tapno saan maikkatan ti asukar ken adda raman ken angotna a nakset.

Primera a tagapulot

Golden brown ti kolor ti primera a tagapulot. Addaan daytoy ti 1.5-3.5 porsiento a kinadam-eg. Ken mabalin a maidulin iti 48 a bulan.

Kabayatanna, nakapartuat ti University of the Philippines Los Baños Institute of Agricultural Engineering iti teknolohia a mangpangato ti panagpartuat iti 75 porsiento babaen ti panangpespes ti ad-adu a tubbogna.#

Comments are closed.