Footer

Visita Iglesia: patibkerenna ti pammati

Itay nabiit, 12 a tattao ti daksanggasat a natay gapu iti pannakaidungpar ti naglugananda a bus iti puon ti akasia sadiay Barangay Palina, Pugo, La Union. Naawanan iti preno ti lugan ket saan a nakontrol ti drayber ti manibela.  Taga-St. Peter Parish sadiay Sta. Rosa, Laguna dagiti pasahero ket kagapgapuda iti Baguio City a nag-visita iglesia.

Maysa ngamin a napateg a tradision iti katolisismo ti visita iglesia no kastoy a panawen ti Semana Santa. Maysa a popular  a debosion iti pammati daytoy a mangrugi iti Mierkoles de Kurkuros.  Maysa a napateg unay a kannawidan a nangrugi pay laeng idi un-unana a panawen.

Ta ania ngamin aya ti makunkuna a visita iglesia?

Dagiti Kastila ti nangiyam-ammo iti Kristianismo iti pagilian. Nagtaud a mismo kadagiti Kastila ti kannawidan a visita iglesia. Dagiti Kastila a kolonisador ti pagilian idi ti kaunaan a nangiyam-ammo daytoy a praktis iti Semana Santa.  Nagtaud daytoy a praktis idi pay un-una a panawen ti Kristianismo. Namunganay daytoy sadiay Roma a sentro ti Katolisismo. Mapasamak ti isusuknal ken panagmeditasion kadagiti dadakkel a pito a basilica iti Roma a kas iti The Saint John Lateran, St. Peter, Saint Mary Major, Saint Paul Outside the Walls, St. Lawrence Outside the Walls, Holy Cross in Jerusalem ken iti St. Sebastian Outside the Walls. Ti naudi ket sinukatan ni Pope John Paul II babaen ti Sanctuary of the Madonna of Divine Love idi tawen 2000.  Daytoy ti namungayan ti visita iglesia.

Kadatayo a Filipino nga addaan iti nauneg a pammati saan laeng a maipapan iti isusuknal ken panagkararag kadagiti naituding a suknalan a simbaan, babaen ti visita iglesia, naikkantayo pay iti naun-uneg ken napaspasnek a rason ti isusuknal. Isu daytoy ti pangiwayattayo iti meditasion kadagiti sangapulo ket uppat nga station of the cross. Kada suknalan, mapasamak ti dua a meditasion ti station of the cross. Apagisu a malpas ti meditasion ti station of the cross  no pito dagiti simbaan a suknalan.

Saan laeng a ti pagilian a mapaspasamak daytoy a practice no di iti intero a sangalubongan ti Katolisismo. Gagangay a mapasamak iti kabukbukodan a lokalidad daytoy lalo iti kaaldawan ti Huebes Santo agingga iti tengnga ti rabiina.

Ta ania ngamin ti itden daytoy a pasamak iti pammati?

Iparangarang ti visita iglesa ti kinaadalem ti pammati dagiti deboto. Saan a parparawpaw a pammati no di ket naigameren iti lasag ken dara. Saanen a maikkat no di ket  lalo pay nga umamnut ti pammati iti tinawen a debosion. Ket itoy a yaamnut ti pammati,  lalo pay a tumibker ti relasion ken Apo Jesucristo ken lalo a lumawag ti pagturongan iti masakbayan.

Nupay maysa daytoy a tradision wenno popular devotion, patibkerenna ti pammati nga agayat ken agserbi. Marikna ti kinaadda ti Dios kadaytoy a panangpatibker iti pammati. Kasapulan ti amin a nasken a patibkeren ti pammati.

Ta kas mabasa iti Efeso 2:8, “Ta gapu iti parabur ti Dios, naisalakankayo babaen ti pammati. Saanyo a bukod nga aramid no di ket sagut ti Dios.” #

Comments are closed.