Footer

Holy Week Syndrome, di pagamkan mannalon: tobacco traders

SAN JUAN, Ilocos Sur – Nupay nababbaba ti presio ti tabako ita a tawen, impatalged dagiti trading centers ditoy probinsia a saan a bumaba ti presio daytoy a produkto kalpasan ti Semana Santa.

Iti report a dimmanon iti Tawid News Magasin, immabuten iti P73 kada kilo ti presio ti tabako a class AA iti isasangbay ti Semana Santa ken P50 kada kilo ti reject.

Ngem nababbaba ti presio ti class AA ita a tawen no maikumpara idi napan a tawen a dimmanon pay iti nasurok a P90 kada kilo.

Kanaig daytoy, nagprotesta ti sumagmamano a gunglo dagiti mannalon gapu iti nababa a presio ti produktoda iti daytoy a tawen.

Maysa a mannalon a dina kayat ti painaganan ti nagkuna a nababbaba iti P15-20 kada kilo ti presio ti tabako no maikumpara idi napan a tawen. Immabut iti nasurok a P90 ti presio ti tabako a class A idi napan a tawen.

Nupay kasta, maysa a trader iti umuna a distrito ti probinsia ti nagkuna a nupay nababbaba ti panaggatangda iti tabako ita a tawen ngem idi napan a tawen, nangatngaton ti panaggatangda iti daytoy a produkto ngem ti naituding a floor price  a P66 kada kilo ti class A.

Impatalged ti nasao a trader a saan nga agsuek ti presio ti tabako kas am-amken dagiti agmulmula iti tabako a mapasamak kalpasan ti Semana Santa.

Aw-awagan dagiti mannalon daytoy iti Holy Week Syndrome gapu iti kapaliiwan a bumaba ti presio a paggatang dagiti traders iti produkto a tabako iti daytoy a panawen.

Iti interbiona ken ni Salvador Tambua, reporter iti DWRS, nupay inannugot ni Namnama Trading Center Manager Maria Carmen Gazmen a nababbaba ti presio ti tabako ita a tawen ngem idi napan a tawen, kinunana a nangatngaton ti presio ti tabako a gatgatangenda ngem iti napagtutulagan a floor price daytoy a produkto.

Nagbalin a P66 kada kilo ti floor price ti class AA a tabako agsipud ta lima a pisos laeng ti intuon dagiti traders ken manufacturers iti floor price ti tabako iti naudi a tripartite conference, adayo nga amang a nababbaba ngem iti kiniddaw dagiti mannalon a P20 a maituon iti floor price ti produktoda a tabako.

Idi 2008, nagbalin a P61 ti floor price ti tabako kalpasan a  natuonan  iti P10 kada kilo ti class A a tabako iti naangay a tripartite conference babaen ti initiatibo ti gobierno probinsial.

Ngem ita a tawen, iti kumperensia a naangay iti provincial capitol, impetteng dagiti traders ken manufacturers ti P2 a maituon iti floor price ti tabako. Nupay kasta, nagpinal a P5.00 ti naituon iti floor price ti tabako ita a panagtatabako.#

Comments are closed.