Footer

INDAYON NI LAGIP: Nagkurusan (Tuloyna)

Nagbalin a nalidem dagiti simmaruno nga aldaw kaniak. Saanen a nagpakita pay ni Rodel. Ni balikas, awan ti nangegko kenkuana. Daytoy ti ad-adda a nangpasaem iti riknak. Apay a dinak maawatan ni Rodel?

Pagyamanak ta adda dagiti pagayamko a nanglinglingay kaniak iti panawen a nmalidlidayak.

“Saan laeng a ni Rodel ti lalaki,” nakuna ni Cecil. “Addanto masarakam a sabali.”

Namrayak laeng ti nagtung-ed. Kaniak a biang, diakto malipatan ni Rodel. Isu ti umuna ken maudi a lalaki iti biagko.

Limmabas ti dua a bulan a diak napupuotan. Mangrugin a mapunas ti sugat iti pusok. Ngem maysa a malem, nagkiriring ti selponko. Nakigtotak idi mangegko ti boses ti immawag. Ni Rodel!

“Kumusta?” kinunana.

“K-kastoy,” medio nagbanarbar ti bosesko. Kunak no mangrugin a malipatak ni Rodel ngem saan gayam. Ita, agsubli manen ti saem. Ay-ayatek pay gayam agingga ita.

“Kunak no maaramidko a lipatenka,” kinuna ni Rodel. “Saanko gayam a maaramid. Sika pay la ti ipitpitik ti pusok.”

Nabayag a diak simmungbat. Ngem nalapunos ti bagik iti ragsak. Ay-ayatennak pay met la gayam ni Rodel!

“Dinak la kadin mapakawan?”

Agkakapsutak a nagtugaw. Ania ti isungbatko?

“Please, sumungbatka,” agpakpakaasi ti timek. “Kayatko nga agsinnublita. Ay-ayatennak kadi met, saan?”

“W-wen, ay-ayatenka pay laeng,” diak napuotan nga insungbat.

“Agyamanak. Umayak sumarungkar inton bigat, mabalin?”

“S-sige, yurayka,” nakunak.

Kasla maitaytayokak idi inrikepko ti selponko. Manen, nagtagimaris ti aglawlawko.

Naklaat da Cecil idi impadamagko ti panagsinnublimi ken ni Rodel. Ngem awan ti tagtagarida. Rinaemda ti rikna ken desisionko.

Ad-adda a pimmuner ni Rodel iti panagkitak idi simmarungkar kaniak. Nasursurok itan ti panangasikasok kenkuana. Kayatko nga awan ti maipilawna iti damona manen nga isasarungkar.

Manipud idin, tunggal Sabado a sumarungkar iti kaserak. Adda latta regalona kaniak.

Ngem no duduakami, adda dagiti gundaway a kellaat lattan nga agkan wenno arakupennak. Agpabus-oyak met. Mamatiak a paset dayta ti panagayan-ayatmi. Ngem no mariknak a medio mayagus ti riknamin, palagipakon ni Rodel.

Maysa nga aldaw, imbaga ni Rodel a dumar-aykami iti selebrasion ti panagkasangay ti maysa a gayyemna.

“Dayta laeng gayam,” nakunak. “Sige,  dumar-ayta iti kasangay ti gayyemmo.”

“Ti problema, iti maysa a beach resort ti pakaangayanna. Agmalmalem ti pasken. Adda pay night swimming. Kapilitan nga umiantayo.”

Diak nagtimek. No umiankami, adu ti mabalin a mapasamak iti agpatnag!

(Adda tuloyna)