Footer

KOMENTARIO: Mapagduaduaan a loyalidad

Ditoy pagilian, nadumaduma dagiti nabuangay a partido a nairanta a mangibayog iti kandidatura ti maysa a politiko nga adda ambisionna nga agpapili iti nangato a pagannongan iti gobierno.

Iti daytoy a May 2010 elections, namirit dagiti partido a nakaikappengan dagiti kandidato. No adu ti partido, adu dagiti kandidato. Kayatna a sawen, adu ti pagpilian dagiti umili a mangidaulo kadakuada. Pammaneknek a ditoy a pagilian, napigsa ti pondasion ti nademokrasiaan a panagpipili.

Ngem ekspektarentayo ti panagbaliw ti partido dagiti kandidato, kas iti panagsukatda iti bado no kasdiay a daanen wenno saandan a maaramat pay.

Itay nabiit, nangrugin ti panagballasiw dagiti lokal a kandidato iti sabali a partido. Napasamaken kadagiti napalpalabas a panagpipili ket mapaspasamak manen iti agdama. Namnamaentayo ti ad-adu pay a panagballasiw dagiti lokal a kandidato iti sabali a partido sakbay ti eleksion. Nagbalinen daytoy a nalaad a paset ti politika ditoy pagilian.

Adu ti awag dagiti kastoy a politiko. Balimbing, kuna dagiti Tagalog. Kas iti balimbing, adu ti balidbidna. Maawaganda pay iti ragadi. Kas iti ragadi, kumpet ti tadem aniaman ti aramidem. Mayarigda pay iti kulibangbang nga agakar-akar. No sadino ti yan ti nabanglo a sabong iti hardin, dita ti pakasarakam kadakuada.Wenno mabirngasanda iti bangkero. Ngamin, nasursurok ngem maysa ti paglugananda a bumangir iti karayan. Kabaliero, kuna met dagiti miron kadagiti kastoy a politiko. Saanda a mapnek iti maysa a pagkabalioan.

Maymaysa ti kayat a sawen daytoy. Ditoy pagilian, awan ti nairut wenno nalagda a lubid a mangpatapat kadagiti politiko nga agintek wenno agtalinaed iti ikub ti partido a nakaikappenganda.

Iti nalawlawag a pannarita, kaarig dagiti politiko ditoy pagilian iti chameleon, nalaka nga agbaliw ti marisda depende iti situasion ti politika.

Dimo maikabit kadagiti politiko ditoy pagilian ti balikas a “loyalidad”. Iti bokabolario dagiti politiko, aggibus ti loyalidadda iti partido a nakaikappenganda no maipasungalngal ti bukodda a pagimbagan ken interes. Adda ti loyalidadda iti partido a makaited kadakuada iti makinaria ken pondo tapno dakdakkel ti tiansada a mangabak iti eleksion. No makitada a dakdakkel ti pagimbagan a maiburay ti sabali a kandidato iti sabali a partido  para iti bukodda a survival iti politika, saanda nga agpangadua a mangtallikud iti partidoda ket kaarigda iti agkatkatay a kuton nga aggaarimutong iti sarusar a nakaikabilan ti tagapulot a pagpiestaanda.

Iti napalabas, nakitatayo ti pagduaduaan a loyalidad dagiti lokal a kandidato iti bukodda a partido. Saantayo a mababalaw ida ta masapul nga agtignay ken ipamuspusanda ti pannakaispal da no makitada a malneben wenno maarinebneben ti bapor a naglugananda.

Ngem mapagduaduaan ti kastoy a politiko: no kabaelanna a panawan ti partido a nakaikappenganna iti tiempo ti krisis, dinto la ketdi agpangadua a mangtallikud kadagiti umili no bukodna nga interes ken pagimbagan ti nakataya.

Agriingkayo, kakailian!#