Footer

SALAYSAY: Naisalsalumina a pagteng iti 2010: namindua a nagkabus iti Enero ken Marso!

Adda naisalsalumina a pagteng iti apagtapog ti 2010:  nagkabus iti umuna ken maudi nga aldaw ti Enero! Kayatna a sawen, namindua a nagkabus idi Enero kadaytoy a tawen!

Naulit manen ti namindua a panagkabusna idi napan a bulan, idi Marso 1 ken 30.

Ania dagitoy a pagteng? Ania ti kaitutopanda? Ania met ti masao dagiti autoridad iti siensia?

Kapator la unay dagiti adda bulambulanenna kadagitoy a panawen, inrungiit tay’ am-ammok a natarabit a babai nga awan sabali a pagduyosanna no di sumarita maipapan ti kabibiag ti sabali a tao. Ngem ti rigat wenno imasna, saanna met a makita ti nagdakkelan a mukatna no labsen ti sumao. No saanko la nagawidan ti serreg dagiti bibigko, amangan no napalkatak iti sao ti mannanao.

Sabagay, manipud idi angged (since time immemorial), diak masinuo no apay a naikonektar iti kabus dagiti addaan “nalukay a tornilio” wenno adda “padpadanonenna” a laglagutirit. Ngem naiduma kadaytoy a tawen ta mamindua ketdin nga agkabus ti dua a bulan, ti Enero ken Marso.

Ania ti makagapu?

Segun iti Philippine Atmospheric Geophysical and Astronomical Services Administration (PAGASA), mapasamak ti kastoy a pagteng gapu iti panaglikos ti bulan iti maminduapulo ket siam a punto  ket lima (29.5) nga aldaw iti makabulan. Gapuna nga adda posibilidad daytoy a mapasamak. Aw-awaganda daytoy iti “blue moon.” Ngem saan a ti maris ti bulan ti kayatna a sawen no di ket “manmano a mapasamak” ti pakaitarusanna. No “once in a blue moon”, makuna a manmano wenno nakisang a mapasamak.

Segun met laeng iti PAGASA, mapasaran daytoy a blue moon iti tunggal dua ket kagudua a tawen. Posible a mapasamak a mamindua nga ag-blue moon ti tawen aglalo no ti bulan a sarunuen ti Enero ket Pebrero nga addaan iti beinte otso nga aldaw.

Sumaruno a mapasamak ti blue moon inton Agosto 2 ken Agosto 31, 2012.

Awan ti pakainaigan ti blue moon iti maris ti bulan. Nupay kasta, segun ken ni  Prisco Nilo, pangulo ti PAGASA, adda idi panawen a nabuya a kasla maris asul-a-bumerde ti bulan idi 1883 ket maitudo a daytoy ti namunganayan ti balikas. Kadaydi a tawen, napasamak ti panagbettak ti Bulkan Krakatoa ket kalpasan ti makatawen, nabuya nga umasul-a-bumerde ti bulan gapu kadagiti impugso ti bulkan a particles. Posible a daytoy ti nakaadawan ti balikas a “blue moon”.

No patien ‘toy sidingan ti dilana nga am-ammok, rumbeng laeng a mapasamak a mamindua nga agkabus iti maysa a bulan iti tunggal dua ket kagudua a tawen. Ngem no siak ti pagdamagam iti sungbat, diak kanunongan toy nagdila a sidingan ta uray mabalin nga adda pagbatayan dagiti rasonna, dakdakkel ti pammatik kadagiti scientific evidences.#

Comments are closed.