Footer

SARITA: Ti Daga a Napnuan Kari (Maudi a paset)

“Mabisinak unayen. Mano iti pagbayadyo, Bai?” dinamag toy lalaki. Agtigtigerger. Dina ammo no apay, maugotanen iti pigsa. Saan nga umanay ti pul-oy ti electric fan iti kannigid a suli a mangited iti bang-ar iti kasla kumusnawen a panagkitana. Siguro iti adayo a pinagna ken bisinna. Nagkiamkiam ti panagkitana, nakakita kadagiti bituen. Nagpusipos ti lubongna. Naglusdoy iti tugawna. Nagikkis ti baket.

Idi makariing, napellesanen iti nadalus a kawes ken nakaidda iti nalamuyot a kama iti bassit a siled. Ti lakay ken baket ti immuna a nakitana. Is-iseman dagiti kolektor.

“Ni Inggo a draybermi ti nangpelles kenka. Siledna daytoy,” kinuna ti lakay idi inaprosan ti lalaki ti barukongna. Nadalus ti suotna a puraw a tisiert ken nangisit a kurduroy a pantalon.

Nagyaman. Naawis a nakilanglang a mangan – iti tinapay, fried chicken ken kape. Sa kalpasanna, inawat ti lalaki ti tseke a bayad ti inlakona. Intarapnosna nga insukat iti banko, kas bilin dagiti gimmatang. Subliannanto ti kaserana tapno agbayad ken alaenna dagiti gargaretna. Sumapulton iti sabali a pagnaedanna. Dina kayaten ti nabuyok a kabarongbarongan iti asideg ti natay a karayan. Siguro, makabirokton iti trabahona. Isamirananto ti agiskuela inton makabirok iti trabaho. No di latta makabirok iti trabaho, agpatulong kadagiti naam-ammona a kaprobinsiaanna iti Quiapo. Aglakolako met kadagiti aksesoria kadagiti selpon uray ket addan pagpuonanna. Dayta ti kangrunaan iti amin, puonan, kas kuna dagiti kaprobinsiaanna.

Ngem sinintir ti bagina.

“Kukuada daydiay. Rumbeng laeng nga isublim!”

“Itedko amin?” dinamagna iti bagina.

“Dumawatka a. Dida met ngata naimut a! Dimo tagikuaen ti dimo kukua!”

Nagulimek.

“Sapulem ida a!” kinuna manen iti bagina.

Nangeddeng. Napan iti kantina nga immuna a nakakitaanna ida.

“Adda agpalpalama ditoy. Idiay man ne, ti pagtugtugawanda,” intudona ti ruar.

“Saanmi nga ammo dayta ibagbagam, mister. Iti kaanoman, saanak pay a nakakita iti agpalpalama nga immarubayan ditoy kantina,” kinuna ti kahera a nagdalungdong iti asul ken nalukmeg a babai nga agedad ngata iti kuarenta. “Piton a tawenko nga agtrabtrabaho iti daytoy a kantina, diak pay nakita dagita ibagbagam.” Nagdamag pay ti kahera kadagiti dua a wetres ngem ngilangil laeng ti insungbatda.

Rimmuar ti lalaki. Dina kayat ti mangipapilit. No agliblibak ti kahera, awan ti maganabna; no agsasao iti pudno, awan latta ti ganabenna ta dina makita dagiti sapsapulenna.

Pagna. Pagna. Pagna. Dina ammo ti turongenna. Nagsardeng idi nakurikoran ti agongna.

“Agatrosas! Hmm, makapasalibukag a banglo,” nakunana ket inkidemna ti nagsay-op. Immisem. Impalawlawna ti panagkitana. Nakatakder toy lalaki iti asideg ti silulukat a ridaw ti dakkel a pasdek.

“Dita met uneg!” naipigsana pay. “Adda la ketdi dagiti agina a sapsapulek iti uneg…” ket nagdardaras a simrek. Ti banglo ti rosas ti nangiturong kenkuana no sadino iti turongenna. Napaliiwna dagiti sumagmamano a nakaparintumeng ken nakatugaw. Naulimek ti nakalawlawa nga uneg ti pasdek. Inayad itan ti pannagna ti lalaki iti igid a sumurong iti altar.

Kellaat a nagtibbayo idi namulagatanna ti eskaparate. Nagsardeng. Linidlidna dagiti matana. Talloda. Minatmatanna ida a nalaing. Manipud saka agingga iti dapan. Pinagsisinnublatna ida a minira – ti agkabannuag a nakasarukod, ti ubing ken ti ina. Nagrupanget. Dua nga imana ti nangkuraykay ken nangpungot iti panguloten a buokna,  aburido iti dina maawatan a mapaspasamak iti biagna. Nagngariet.

“Mabagbagtitak metten…!” naipigsana ti timekna.

“Adda maitulongko?” kinuna ti agkabannuag a nakaabito nga immasideg.

“Asinoda?” intudona ti eskaparate.

“The Holy Family…Dimo am-ammo ida?”

“Saan, apo…”

“Asinoka? Ania ti naganmo? Taga-anoka?” iniseman ti nakaabito a lalaki nga agedad ngata iti kuarenta, pamudawen ken nataytayag bassit ngem isu.

“Jamalul Embu Sahaba Usman Sali, apo. Maysa a Tausug, taga-Lanawan, Sumisip, Basilan. Agtawen iti duapulo ket tallo…” #

Comments are closed.