Footer

20,000 sako ti mais a produkto dagiti mannalon ditoy probinsia, puntiria a gatangen ti NFA

VIGAN CITY – Kinuna ti dadaulo ti National Food Authority a puntiria ti opisinana ti gumatang iti 20,000 a sako ti mais  kas paset ti pannakapabaro ti maysa a katulagan a nagpinnirmaanda iti gobierno probinsial itay nabiit.

Impasingked pay ni NFA Provincial Manager Fortunato Bulao nga agtultuloy latta ti panaggatangda iti daytoy a produkto uray lumbes iti puntiriada.

Iti maikatlo a gundaway, napabaro manen idi Marso 25 ti maysa a memorandum of agreement iti nagbaetan ti NFA ken ti gobierno probinsial ti Ilocos Sur para iti panaggatang iti produkto a mais dagiti corn farmers iti probinsia.

Ni Gov. Deogracias Victor “DV” Savellano ti nangibagi iti gobierno probinsial idinto nga imbagian ni Provincial Manager Fortunato Bulao ti NFA ti panagpinnirmada iti katulagan ti Corn Marketing Assistance for Industry Produsers, Users, and Local Government Units a naangay iti provincial capitol ken sinaksian dagiti municipal agriculturists, mangidaulo iti kooperatiba ken mangibagi iti farmers organizations iti Ilocos Sur.

Naipalaon iti nadakamat a MOA nga aggatang ti NFA iti mais iti P13 tunggal kilo kadagiti lehitimo a corn farmers, nangatngato no ikumpara iti panaggatang dagiti corn traders iti agdama.

Kinuna ni Savellano a maysa a wagas daytoy tapno malapdan ti pannakagundaway dagiti mannalon babaen kadagiti traders a manggatgatang iti produktoda iti nababa a presio.

“Talaga a nababa ti presio ti mais ket babaen iti daytoy a programa a nagkammayetan ti gobierno probinsial ken NFA, maaddaan iti alternatibo a pagilakuan dagiti mannalon,” kinuna ti gobernador.

“Masapul laeng a mangipakita dagiti umay aglako iti sertipikasion manipud iti kapitan ti barangayda nga isuda ket lehitimo a mannalon tapno awaten ti NFA ti produktoda. Aramidentayo daytoy tapno malapdan dagiti manglimlimo nga agkuna a mannalonda uray tradersda met gayam,” kinuna met ni Bulao.#

Comments are closed.