Footer

BANNER NEWS: Nakapatay a konsehal, napilaan iti kaso

SANTA MARIA, Ilocos Sur – Naipaiman iti provincial prosecutor’s office ti kaso maikontra iti maysa a konsehal a mapapati nga aksidente a nakapatay iti maysa a baro iti Barangay Butir ditoy nga ili itay nabiit.

Segun ken ni Police Senior Inspector Jovencio Orbien, hepe ti polis ditoy nga ili, murder ti indatagda a kaso maikontra ken ni Konsehal Ceferino Bedar, 41, residente iti nadakamat a lugar gapu iti pannakapaltog ken nakatayan ni Alexander Tubog, 27, baro, kalugaran ti konsehal.

“Under evaluation ti kaso iti provincial prosecutor’s office ket makaammodanton no ania ti evaluationda kadagiti naidatag nga ebidensia,” kinuna ni Orbien bayat ti interbio kenkuana ni Jun Ramos, anchor ti Barangay Commando Brigada ti DWRS.

Adda iti kustodia ti polis ditoy ni Bedar agraman ti cal. 45 a naaramat iti pammaltog nga addaan iti maysa a magasin a nagkarga iti 10 a bala.

Kinuna ti hepe ti polis ditoy a kinuna ni Bedar a lisensiado ti paltog ngem awan pay ti impakita daytoy a dokumento. Madama ti panangberipika ti polis iti Firearms and Explosives Division iti Camp Crame no lisensiado ti paltog.

Kinuna ni Orbien a makasuan pay ti konsehal iti panagsalungasing iti Comelec election gun ban.

Iti inisial nga inbestigasion dagiti otoridad,  nagkikita da Bedar ken Joel Calibuso a kaduana da Tubog, ti ina daytoy a Marita, ken maysa nga agnagan iti Sherwin iti igid ti karayan ket mapapati a kinumpronta ti konsehal ti kalugaranna a ni Joel Calibuso mainaig iti ririda iti napalabas. Mapapati a kinugtaran ti konsehal ni Calibuso a nakakaruskosan daytoy iti teppang ti karayan.

Mapapati a suroten koma ti konsehal a nakaasut iti paltog ni Calibuso ngem naikaglis ket nagkanalbuong ti paltog a nakapuntaan ti makannigid a luppo ni Tubog.

Kinuna ni Orbien a kas maibatay iti post mortem a naisayangkat iti biktima, manipud iti luppo, nagpangato ti bala ket nadamgis dagiti small intestines ken dadduma a naguneg ti biktima.

Saanen a naiyabut ti biag ti  biktima iti ospital.

Boluntario a simmuko ti konsehal iti polis.

Daytoy ti maikadua a pammapatay ditoy nga ili iti uneg ti makalawas.

Idi rabii ti Abril 4, napapatay ti maysa a barangay captain iti Barangay Poblacion ditoy nga ili.

Comments are closed.