Footer

INDAYON NI LAGIP: Nagkurusan (Tuloyna)

“Sige, umannugotkan,” kinuna ni Rodel, “tapno mabukel ti grupo.”

“Mabalin met a dakayo laengen,” nakunak. “Ken maysa, adda opisinak.”

“Isu a Sabado ti panangselebrarna iti kasangayna tapno saan a problema ti panagopisina. Ken maysa, pares-pares. Nakuna dagiti barkadak nga immanamongen a sumurot dagiti nobiada. No awanka, siakto laeng ti awan kaasmangna. Nasaysayaat laengen a diak dumar-ay no awanka.”

“Saan koma a siak ti lapped iti idadar-aymo iti kasangay ti gayyemmo,” nakunak.

“Kasano nga aghapihapiak no siakto laeng ti awan asmangna?”

“Ala, sumurotak. Ngem ikarim a dika aglabes iti uged… ammomon ti kayatko a sawen.”

“Ikarik,” kinuna ni Rodel ket naarakupnak pay. “Dagasendakanto ngarud iti agsapa ti Sabado.”

Nasapa a dinagasdak iti Sabado. Siak ti kaudian a dinagasda. Dua a kotse ti naglugananmi.

Nakaar-arimbangaw dagiti kakaduak a babbai bayat ti panagdaliasatmi. Pinalpaliiwko ida. In-inut a napukaw ti kebbakebbak idi maammuak a naggapuda iti disente a pamilia.

Iti Pagudpud ti nagturonganmi. Adda gayam reserbasion ni Arnel, ti agkasangay, a tallo a kuarto. Bagina ti maysa a kuarto idinto a pagkuartoan dagiti babbai ken dagiti lallaki ti dua.

Talaga a sinaganaan dagiti kaduak, da Lizle, Anna, Menchu ken Nik-Nik, ti ipapanmi iti beach. Adda inkuyogda nga aruaten a pagdigos. Siak laeng ti nagaruat iti shorts ken kamiseta.

Nagsusultip dagiti lallaki idi rummuarkami iti pagpellesan. Limmabbagaak idi matiliwko ti mata ni Rodel a nangmatmat iti pakabuklak. Saanko a panangibuat iti bukodko a bangko, siak ti kalinisan iti kudil ken kapintasan iti rupa ken  pammagi kadagiti kaduak a babbai.

“Isu met la a di payen tumaliaw ni Pari Rodel iti sabali a babai ta addaka gayam nga ul-ulesanna,” nakuna ni Ambet, ti partner ni Nik-Nik.

“Awan kadin ti kabsatmo, Maricel?” dinamag ni Bert, ti asmang ni Lizle.

“Hep, baka nalipatam sa a nalaingak iti karate,” kinuna ni Lizle. “Ayna, bullo amin a parte ti bagim a sumangpet iti balayyo no sabali ti pagsikkuam.”

Nagkakatawa ti ummong.

Timmapogkami amin. Nagsisinnayokami. Tumtumpaw ti katawa ken garikgikmi.

Idi nauma dagiti lallaki, napanda iti kalapaw iti sirok ti nyog ket rinugianda ti naggiinom iti serbesa. Nabatikami a babbai. Mayat ti aguper iti danum.

“Nabayagkayon ken ni Rodel?” inamad ni Anna kaniak. “Ita la ngamin a makitadaka nga inkuyog ni Rodel.”

“Di pay nabayag,” nakunak. “Adda kadi kadua a sabali ni Rodel no kastoy nga adda outingyo?”

“Adda. Ngem mabalin nga insinanan ta addaka metten iti biagna,” insungbat ni Anna.

Nagkuretret ti mugingko. Adda sabali a babai iti biag ni Rodel? Apay nga awan man la ti nadakdakamatna kaniak?

(Adda tuloyna)

Comments are closed.