Footer

Kas inamak dagiti mannalon: presio ti tabako nagsuek kalpasan ti Semana Santa

VIGAN CITY – Iti baet ti panangipatalged dagiti aggatgatang iti tabako a saan a lumaka daytoy a produkto kalpasan ti Semana Santa, nagsuek ti presiona kas am-amaken dagiti agmulmula iti tabako ditoy probinsia.

Iti report a dimmanon iti Tawid News Magasin, bimmaba ti presio ti tabako iti P65 kada kilo iti medium class a tabako manipud iti P73 kada kilo sakbay ti isasangbay ti Semana Santa idinto a nagbalin metten a P40 kada kilo ti reject.

Idi napan a tawen, immabut iti nasurok a P90 kada kilo ti presio ti class A a tabako.

Sakbay ti Semana Santa, impeksan dagiti mannalon ti panagamakda nga agsuek ti presio ti tabako a paggatang dagiti traders iti produktoda kas napasamak kadagiti kallabes a tawen iti baet ti panangipatalged dagiti traders a saan a mapasamak dayta.

Aw-awagan dagiti mannalon daytoy a pagteng iti Holy Week Syndrome gapu iti kapaliiwan a mapasamak daytoy kalpasan ti Semana Santa.

Ngem segun iti maysa nga opisial ti NTA, saan a ti Holy Week Syndrome ti makagapu iti panagpababa ti presio ti tabako no di gapu ta pimmuskol ti bulong daytoy gapu iti masagsagrap nga El Niño phenomenon.

Segun iti nasao nga opisial, bimmaba ti presio ti tabako ta napuskolen ti rumrummuar a maluto a bulong ti tabako gapu iti napudot a panawen a parparnuayen ti panagbaliw ti klima ti lubong.

Immun-una ngem daytoy, napaay dagiti mannalon a manggun-od iti P20 a maituon iti floor price ti tabako iti naangay a tripartite conference dagiti mannalon, traders ken manufacturers ken ti National Tobacco Administration.

Nupay impababa dagiti mannalon iti P10 ti mainayon iti floor price ti tabako, impetteng dagiti traders ti P2 kada kilo a maituon iti floor price ti tabako. Nagpinal a P5 ti mainayon iti floor price daytoy a produkto iti daytoy a panagtatabako.

Idi 2008, nagbalin a P61 ti floor price ti tabako kalpasan a natuonan iti P10 kada kilo ti class A a tabako ket immabut pay iti nasurok a P90 ti pinaggatang dagiti traders iti class AA a tabako.

Ngem iti panaglukat ti trading season iti daytoy a tawen, nagbalin laeng a P61 kada kilo ti presio ti class AA a tabako a pinaggatang dagiti traders, adayo a nababbaba ti presio ngem idi napan a tawen.

Ngem inkalintegan ti maysa a trader iti umuna a distrito ti probinsia a nupay nababbaba ti panaggatangda iti tabako ita a tawen ngem idi napan a tawen, nangatngaton ti panaggatangda iti daytoy a produkto ngem ti naituding a floor price a P66 kada kilo ti class A.#