Footer

P10-M pondo para pautang, naipaima iti kooperatiba

CAOAYAN, Ilocos Sur – Inwaragawag ni Gov. Deogracias Victor “DV” Savellano ti panangipaima ti gobierno probinsial iti P10 milion iti Nueva Segovia Consortium of Cooperatives (NSCC) tapno agbalin a pondo ti pautang para kadagiti mannalon ditoy probinsia.

Naipaima ti tseke nga aggatad iti P10 milion iti NSCC kagiddan ti pannakaangay ti maika-18 a annual general assembly daytoy idi Marso 29 ditoy.

Maipautang daytoy a pondo kadagiti mannalon ti  tabako ken pagay, kasta metten kadagiti mayat nga agpuonan para iti micro enterprise. Addaan laeng ti pautang iti interes a 5% iti uneg ti sangapulo a bulan.

Kinuna ti gobernador a daytoy ti  wagas ti gobierno probinsial tapno makatulong kadagiti babassit a negosiante ken mannalon kasta met a maipasagepsep kadakuada ti responsibilidad iti panagbayad iti utang ken maiwaksi ti prinsipio ti dole out.

“Iti daytoy a pautang a tarawidwidan ti NSCC, 5% laeng ti interes ti buloden a gatad iti uneg ti 10 a bulan. Daytoy siguron ti kababaan nga interes iti panagpautang,” kinuna ni Savellano.

Malaksid iti dayta, adda metten pondo a naipaima iti Land Bank of the Philippines  Vigan para iti isu met laeng a klase ti pautang. Iti biang ti LBP, nangipaayda iti kanayonan a pondo para iti nasao a programa.

Impakaammo pay ni Gov. Savellano ti panangiyawatna iti hybrid a Brahman a baka iti 13 a kooperatiba iti agduduma nga ili iti probinsia tapno ditoy ti pagpadakepan dagiti agtartaraken iti baka. Iti kastoy a wagas, dumakkel ti puli dagiti neytib a baka iti Ilocos Sur.

Kabayatanna, pinagyamanan ni NSCC Chief  Executive Officer Divina Quemi ti gobernador gapu iti panangipaimana iti nasao a gatad a kinunana a dakkel ti maitulongna iti pannakirupak iti kinapanglaw.

Indagadag ni Quemi ti yaasideg dagiti mannalon iti NSCC tapno mairanudda iti daytoy a proyekto a nagkammayetan ti gobierno probinsial ken ti kooperatbia nga imatonanna.#

Comments are closed.