Footer

SARITA: Antokoy, Kandidato para Mayor (Umuna a paset)

Kalkalpas a tinaming  ni Jose “Antokoy” Madriaga ti maudi a “pasientena”, maysa a lakay a naatake gapu iti panagtomarna iti Viagra iti dayta a malem ti Martes. Naginanaanna ti nagdengngeg iti DZPT Manso Radyo.

Madamdama, naipatangatang ti anunsio ti punerariana.

“Kayatyo kadi a naisem dagiti minatayyo? Ipaay ti Sleep Forever Funeral Homes daytoy naisangsangayan a serbisio. Agserbida iti uneg ti 24 nga oras ken uray iti katengngaan ti super typhoon. Nalaka dagiti agkakapintas a lungon a mabalin a pagpilian. Adda pay libre a bingo cards ken baraha a karaman iti funeral package.  Ti Sleep Forever Funeral Homes ket kukua ken imatonan  ti International Licensed Embalmer a ni Jose” Antokoy” Madriaga.”

Napaisem ni Antokoy a nakangngeg iti anunsio ti punerariana iti DZPT Manso Radyo. Nupay isu ti makinkukua iti puneraria, ad-adda nga isu ti makakaammo a mangasikaso iti amin a bangkay a mabalsamar.

Madi idi ti inana a mangala iti embalming a kurso ket impangtana pay daytoy a dina pagtuloyen nga agbasa ngem apaman a nalpasna ti kursona a Management ken nakapagabrod, inkanayonnan nga intuloy ti “immuna nga ayatna” agingga a nakaala iti internasional a lisensiana. Nagsubli iti ilida a Calungonan idi kanikatlo a tawen tapno ipatakderna iti lugarda ti Sleep Forever Funeral Homes, ti kaunaan a puneraria nga addaan iti crematory center ken addaan iti world class a serbisio.

“Diaske, Disiembre 1 gayamen,” intanabutob ni Antokoy idi mataldiapanna ti dakkel a kalendario iti diding ti opisinana a nayapiring iti morge. Agtawenen iti tallopulo ket lima ngem baro pay. Nupay adda met kupkupikopanna a kinataraki, agtukiad a dagus ti balasang a sabsabongenna no maammuanna ti kinabalsamadorna.

Pagammuan ta kasla nasinit iti aluten ti patongna iti de kutson a tugawna. Kinitana ti wall clock. Apaglabes nga alas kuatro. No agrubuat itan, addanton iti opisina ti COMELEC sakbay ti alas singko.

Ginuyodna ti drawer ti lamisaan ket inruarna ti nasuratannan a Certificate of Candidacy. Idi pay laeng kalkalpas ti piesta dagiti natay a nabukel ti planona a sumrek iti politika. Ta apay ketdin a saan? No kualipikasion met laeng, adayo ti pangitarayanna iti anak ti “aggraduar” a mayor. Aggraduar kunada iti makalpas iti tallo a terminona a politiko. Ita ta malpasen ti termino ti mayor, ti anakna ti iduron daytoy a papili kas mayor ti Calungonan.

Naglibbi ni Antokoy. No husto ti nasagapna a damag, naggapu iti Recto University ti ipangpangas ti anak ti mayor a diplomana isu a PAL wenno palamunin pay laeng agingga ita.

No pundo ti pagsasaritaan, umdas met ngatan ti urnongna a pagkampaniana. Padasennanto pay ti umasideg iti asosasion dagiti lisensiado a balsamador iti pagilian a nakaikappenganna.  Maysa pay, awan pakasarsaritaanna iti kinabalsamadorna. No awanan ti natayan, adda tay funeral packagena para kadagiti indigent: iti siete mil kinientos laeng kumpleton ti serbisio. Mabalin pay ti hulugan iti punerariana. Three gives iti uneg ti innem a bulan. Kinapudnona, maysa pay a pinadayawan ti Provincial Social Welfare and Development Office idi napalabas a tawen gapu iti panangipatpatungpalna iti 20% a diskuento iti maustel a senior citizen no la ket adda ipakita ti kabagian daytoy nga ID. Agpaitulod pay iti mummy card, sangabote a kape ken sangalata a biskuit iti minatayan.

Napaisem ni Antokoy iti bangbangir a nakalagip iti dayta nga istratehiana. Uray kaskasano, sinakbayanna daytoy nga itatapogna iti basingkawel ti politika. Napanunotna met ketdi ti makikappeng koma iti partido yantangay eleksion nasional met ita ngem inkeddengna idi agangay ti agtaray kas independiente tapno maliklikan ti panangpiltakda kenkuana a maysa a trapo.

Imparada ni Antokoy ti luganna iti sirok ti narukbos a kayo ti aruo iti sango ti opisina ti COMELEC. Nasdaaw ta kasla napakigtotan a bakes ti langa dagiti nadanonna a tattao nga agaarimutong iti sango ti opisina. Naladawen idi maamirisna a tay Mercedes Benz a karro ti nalugananna ken tay makapaduayya a “Hindi Kita Malilimutan” ti maipatpatayab a sonata manipud iti trompa daytoy.

Sinalbag, ti metten karro iti abay ti puraw a Fortuner ti nalugananna!

Namrayan laengen a kinuti ni Antokoy ti abagana. Saannan a maibabawi pay ti biddutna. Dinagdagusna a pinidut dagiti papelesna ket nagdardarasen a simrek iti opisina ti Comelec tapno isubmitena ti sertipiko ti kandidaturana para mayor ti Calungonan.

(Maituloyto)