Footer

2 pay pammapatay, naisayangkat iti Magsingal, Narvacan

MAGSINGAL, Ilocos Sur – Iti baet ti nainget a kampania ti kapolisan mainaig iti gun ban, dua pay a lalaki ti nagsaruno a nagudas babaen ti paltog itay lawasna.

Pinaltogan ti kinaririna a lalaki ni George Unista, 38, naasa-waan, residente iti Barangay Patong ditoy nga ili, a puon ti nakatayanna iti Barangay Santa Monica ditoy nga ili idi rabii ti Abril 15.

Saanen a naidanon iti Magsingal District Hospital ti biag ni Unista gapu kadagiti grabe a sugatna iti nadumaduma a paset ti bagina.

Segun iti report, iti pasado alas dies ti rabii, umin-inom ti suspek iti sanguanan ti maysa a pagtagilakuan iti nadakamat a barangay idi immasideg ti biktima.

Di nailanad iti report no ania ti gapu a nagsubang dagiti dua.

Inasut ti suspetsa ti paltogna sana pinaputokan iti namin-adu a daras ti biktima. Naglibas ti suspetsa kalpasan ti pammaltog.

Nakarekobre dagiti inbestigador iti walo a kapsula mani-pud iti cal. 45 iti nakapasamakan ti krimen.

Segun iti polis, mapapati nga adda diperensia ti panunot ti biktima ket naipaagas pay iti maysa a mental hospital iti Baguio City.

Kabayatanna, dimteng ni patay a di napupuotan ti maysa fish dealer gapu ta kaimas ti turogna iti uneg ti luganna.

Insigida a natay ni Robert Asuncion Collado, 46, gapu  iti panangpaltog kenkuana ti di pay nabigbig a tao babaen ti cal. 45.

Segun iti report, kagapgapu ti biktima iti biahe ket gapu iti bannogna, imparadana lattan ti trakna iti sanguanan ti balayna sa naturog.

Kabayatan ti pannaturogna, nagsardeng ti maysa a motorsiklo a nagluganan ti nakahelmet a suspek ket pinaltoganna ti ulo ti biktima.

Sakbay dagitoy a pammapatay, dua a kaso ti pammaltog ti napasamak iti Santa Maria, Ilocos Sur a nakainbolbaran ti maysa a konsehal ken nakapapatayan ti maysa a barangay captain.

Napilaanen iti kaso a murder ni Konsehal Ceferino Bedar, 41, residente iti Barangay Butir, Santa Maria, Ilocos Sur gapu iti mapapati nga aksidente a pannakapapatayna ken ni Alexander Tubog, 27, baro, kalugaran ti konsehal.

Segun iti inbestigasion,  nagenkuentro da Bedar ken Joel Calibuso a kaduana da Tubog, ti ina daytoy a ni Marita, ken agnagan Sherwin iti igid ti karayan ket mapapati a kinumpronta ti konsehal ti kalugaranna a ni Joel Calibuso mainaig iti ririda iti napalabas. Mapapati a kinugtaran ti konsehal ni Calibuso a nakakaruskosan daytoy iti teppang ti karayan.

Mapapati a suroten koma ti konsehal a nakaasut iti paltog ni Calibuso ngem naikaglis ket nagkanalbuong ti paltog a nakapuntaan ti makannigid a luppo ken nakadamgisan ti naguneg ni Tubog.

Madama ti panangberipika ti polis iti Firearms and Explosives Division iti Camp Crame no lisensiado ti cal. 45 a paltog ni Bedar.

Idi Abril 4, natambang ni Barangay Captain ti Silag Jovencio de Gracia, 47, iti Poblacion, Santa Maria, Ilocos Sur idi aggawid koman manipud iti maysa a programa nga inatenderanna babaen dagiti di nabigbig a suspetsa a naglugan iti motorsiklo.

Cal. 45 ti paltog a naaramat iti panagtambang.

Kitkitaen ti polis ti anggulo nga adda pakainaigan ti kaso ti biktima iti napalabas iti panagtambang.#