Footer

Bakla, napapatay iti beauty parlorna

VIGAN CITY – Nasarakan a maysan a bangkay ti akinkukua iti maysa a beauty parlor iti Bonifacio Street, Barangay I ditoy siudad iti parbangon ti Abril 15.

Nasarakan a natayen ni Victorino “Vicky” Urbano, 54, residente iti Barangay 4, Vigan City, awanan asawa, bakla,  akinkukua iti Vicky Urbano Beauty Parlor, iti comfort room ti nadakamat a shop iti pasado alas dose y media ti parbangon ti Abril 15.

Nagsagrap ti biktima kadagiti bagsol iti nadumaduma a paset ti bagina a puon ti ipapatayna.

Awan pay ti suspetsa iti pammagsol nupay kuna ti polis nga adda anggulo a kitkitaenda. Nupay kasta, saan nga impalgak dagiti inbestigador ti sursurotenda nga anggulo tapno saan a maunaan ti panagimbestigada.

Segun iti report, nasdaaw ni Edgar Reintegrado, guardia ti Felmar building, gapu ta nakalukat ti ruangan ken nakasindi dagiti silaw ti beauty parlor idinto a naladawen ti rabii ket pinukkawanna ni Erica Bautista, caretaker ti pasdek a nakaibalayan ti nasao a shop, tapno mapanna kitaen ni Urbano.

Ditoy a naduktalan ti caretaker a maysan a bangkay ni Urbano, nadigos iti bukodna a dara.

Segun iti polis, sumikkilen ti biktima idi maduktalan ti pannakapapatayna.

Kinuna ni Reintegrado a nasdaaw no apay a nakalukat ti silaw ken ruangan ti beauty parlor agsipud ta masapa nga irikrikep ni Urbano ti shopna gapu ta aggaw-awid iti balayda iti Barangay Tamag.

Segun ken ni Reintegrado, manipud iti alas 6 agingga iti alas siete y media, irikepen ni Urbano ti shopna.#