Footer

BANNER NEWS: Produksion ti tabako iti probinsia, nainget a monitoren ti NTA

VIGAN CITY – Nainget ti panangmonitor ti National Tobacco Administration iti total produksion ti tabako ditoy probinsia tapno saan a maipanaw ket dagiti met laeng agindeg ditoy ti agnaar iti bingay iti excise tax kas intuding ti linteg a pinutar ni dati a Gov. Luis “Chavit” Singson.

Iti pannakipatang ni  Faustino Taan, hepe iti operation, iti media itay nabiit, kinunana nga adda dagiti trading centers manipud iti Ilocos Norte ken La Union a sumsumrek ditoy probinsia nga aggatang iti naluto a bulong ti tabako ket daytoy ti nainget a sipsiputan ti ahensiada tapno saanda a maipanaw iti Ilocos Sur ken agbalin a produksion ti sabali a probinsia.

Kanaig daytoy, impakaammo ti nasao nga opisial nga adda natudingan nga NTA personnel nga agala iti data kadagiti trading centers no mano dagiti naiserrek a produkto dagiti mannalon tapno mairekord dagitoy a pakaibasaran iti total a produksion ti probinsia.

Daytoy met laeng ti pakaibasaran ti pannakompiut iti excise tax a bingay ti probinsia kas sagudayen ti RA 7171.

Iti napalabas, mapapati nga adda dagiti nakalusot a produksion ditoy probinsia ket nainayonda iti sabali a probinsia a nakaigapuan ti basbassit a bingay ti probinsia iti excise tax ti tabako.

Ti Ilocos Sur ti kadakkelan ti produksion kadagiti agmulmula iti Virginia a tabako a pakairamanan ti Ilocos Norte, Abra ken La Union. Setente porsiento iti produksion ti tabako ti aggapu ditoy Ilocos Sur.

Itay nabiit, immawat ti probinsia iti P3 bilion manipud iti P6 bilion  a kadagupan a bingay dagiti tobacco producing provinces  iti RA 7171, pinutar a linteg ni Singson idi diputado a mangibagi iti umuna a distrito ti Ilocos Sur.

Sagudayen ti nasao a linteg a maited ti P15%  iti excise tax iti mapartuat a sigarilio a kas bingay dagiti probinsia nga agmulmula iti tabako.

Manipud itoy, 30% ti bingay ti probinsia, 30% ti bingay ti congressional districts, ken 40% ti bingay dagiti munisipalidad.

Kabayatanna, kas inamak dagiti mannalon, bimmaba ti presio ti tabako kalpasan ti Semana Santa.

Aw-awagan dagiti mannalon daytoy iti Holy Week Syndrome gapu iti kapaliiwan nga agsuek ti presio ti tabako kalpasan ti isasangbay ti Semana Santa.

Iti sanguanan ti pannakadismaya dagiti mannalon, inkalintegan dagiti traders a nupay nababbaba ti presio ti tabako ngem idi napan a tawen, nangatngato ti panaggatangda ngem iti naituding a P66 a floor price ti tabako.

Iti daytoy a panagtatabako, nagpatingga laeng iti P73 ti presio ti nangato ti klasena a tabako idinto nga idi napalabas a tawen, immabut pay iti nasurok P90 kada kilo ti presio ti Class AA a tabako.

Nagpinal  laeng a P5 kada kilo ti naituon iti P61 kada kilo a floor price ti tabako iti daytoy a tobacco season, nababbaba ngem iti P10 kada kilo a naituon idi 2009.#

Comments are closed.