Footer

INDAYON NI LAGIP: Nagkurusan (Tuloyna)

NALAMIISEN ti puyupoy nga ibelbel-a ti taaw. Iti laud, mangrugin a lumabanag dagiti ulep.

Napataliawkami iti ummong dagiti lallaki gapu ta nagpapaggaakda. Mayat ti estoriada bayat ti panagituyagda iti bote ti serbesa. Maikapaten daytoy a kahon ti serbesa. Abasto latta ti pulotanda.

“Awan manen, sengloten ni Arnel,” nagwingiwing ni Menchu, ti gf daytoy.

“Baka saanen a makauli iti kama,” kinuna ni Anna ket timpaw ti garikgikda. Napataliaw la ket ngarud dagiti lallaki iti ummongmi.

Timmakder dagiti lallaki ket bagkatda ti sangakahon a serbesa, immayda iti yanmi.

“Ag-en-enjoykayo met laeng, ladies?” inamad ni Arnel.

“Of course naman, dakayo la kadin ti agraragsak?” nakuna ni  Menchu.

“Adda pay dua botelia ti red wine no kayatyo nga ituloy ti uminom,” kinuna ni Arnel. Imminom dagiti kakaduak a babbai iti red wine sakbay ti pangaldaw. Pagpaimas kano iti kaan.

“Wow, talaga a sinaganaam ti kasangaymo!” kinuna ni Nik-Nik sana kiniddayan ni Menchu, ti gf ni Arnel.

“Siempre, diak kayat nga adda makuna ti barkada ni sweetheart!” kinuna ni Arnel sana siniket ni Menchu.

“Ops, tsansing daytan, Mr. Alonzo!” agkatkatawa ni Menchu a nangiduron ken ni Arnel.

“Itay pay la a saan a matimtimek ni lady lovemo?” inkidag ni Arnel ken ni Rodel sanak kinita.

“Ita la ngamin a naawisak iti kastoy,” nakunak. “Ngem didak pagdanagan, okayak.”

“Sabsabalika kadagiti inkuyog ni…. annay!” naapput ni Ambet ti bakrangna a siniko ni Rodel.

“Ops, naglokon daytoy a siko ta sumro manen ti gatelna a sumiko iti tarabitab,” nagkatawa ni Rodel a siak ti kitkitaenna.

“Ay wen, gayam, daytoy ketdi a dila ta masansan a maikaglis a puon ti pakaisarsarakak no dadduma,” inrungiit ni Ambet.

“Dimo dengdenggen dagitoy kakaduak,” kinuna ni Rodel. “Kastada dagita. Naparatoda.”

Madamdama, limneken ti init iti laud. In-inut a nagdalapdap ti sipnget iti igid ti baybay. Iti beach house, nakarangrangrangen iti silaw. Dimmanon iti yanmi ti nagarampang a tokar.

Timmakder da Arnel ket pares-paresda a nagturong iti baybay. Mapanda kano agdigos sakbay nga umunegkami tapno mangrabii.

Immabay ni Rodel kaniak. Nariknak ti luppona a naidennet iti luppok. Diak ammo ngem nagimnas man ti rikna a simmangbay kaniak. Iyeg-ipanaw ti pul-oy ti arasaas dagiti agpasag nga allon iti kadaratan.

“Thank you for coming,” kinunana. “Kakaasiak la ketdi iti kantiaw iti barkadak  no saanka nga immay.”

“Saannak ngamin a naruam iti kastoy a pasken a pares-pares,” kinunak.

“Mairuamkanto. Saanto laeng a daytoy ti umuna a pakaawisanta.”

Nalagipko ti naisalpika ni Anna nga adda idi inkuyog ni Rodel a babai idi adda beach partyda iti napalabas.

“Baka idi awanak pay iti biagmo, adda metten inkuykuyogmo no kastoy nga adda okasion,” pinangsintirko ken ni Rodel.

“Siksika pay laeng ti inawisko iti lakadmi nga agbabarkada,” kinuna ni Rodel sana pinidil ti timidko. “Ngem nagasgasatak ngem isuda ta malaksid a napintas ti kaayan-ayatko, masiguradok a nasingpet ken maysa pay laeng a birhen nga idatagko iti altar.”

Saannak a nagtimek. Agliblibak ni Rodel! Ania koma ti panggapuan ni Anna a nangibaga nga adda babai iti biag ni Rodel iti napalabas, tapno sintirenna ti kaririknak?

(Adda tuloyna)

Comments are closed.