Footer

SARITA: Antokoy, Kandidato para Mayor (Maikadua a paset)

Sinabat a dagus ti dua a mediamen ni Antokoy apaman a nalpasna ti panagipilana iti kandidaturana. Nalasinna a dagitoy dagitay aw-awaganda iti tusong twosome iti ilida ta ti la agrakraket ti ammoda ken nalaingda pay nga agpauyo no dimo ida mapagustuan. Dida no kuan iyere ti estoria no mapasugkian ida ti ininterbioda. Nadamagna nga itay laeng napan a bulan, napanda ininterbio tay retirado a soldado a pinaltogan ti nakasubangna a bombero. Inkari kan dagitoy nga iyereda ti interview ngem idi pinapetpetan ida ti bombero iti nakatapaya tapno didan ipatangatang ti dama, ay ket kasladan napiaan a letteg iti singit.  Namin-ano metten a dina pinagustuan dagitoy idi immayda uyotan nga agpakomersial iti estasionda gapu ta di met nalawag ti signalda ngem ita ta agkandidaton, masapul a lamlamuyotennan dagitoy ta uray no limlima laeng ti nakamonitor iti estasion dagitoy tusong twosome, makatulongto iti kandidaturana.

“Apay a napanunotyo, Apo Antokoy, ti tumaray a mayor ti Calungonan?” insarang ti reporter ti mikropono iti batog ti ngiwat ni Antokoy idinto a sinirig ti maikadua ti lente ti video camerana.

“Ah.. e kua, ammotayo met a kualipikadotayo a kumandidato isu nga immaytayo met impila toy COCtayo iti kasta maaddaan met iti alternatibo a pagpilian dagiti umili itoy umay nga eleksion,” medio nagbeddal pay a simmungbat ni Antokoy.

“Ania kadi ti rantayo itoy a panagkandidatoyo?” inimtuod latta ti reporter.

“Kayatko met a pagserbian dagiti kailiak ditoy Calungonan,” nasayuden ti panangsungbatna iti saludsod.

“Kasanoyo a sungbatan dagiti iparuardanto a black propaganda kadakayo aglalo ket maysakayo a balsamador?” impasaksak manen ti reporter.

“Umuna, awan ti dakes nga aramidtayo. Adu dagiti natulongantayon a natayan ken awan ti dakes a panggepko itoy a panagkandidatok. Natan-ok ti pagsapulantayo. Sapay la koma ta suportaranyonto dagiti idatagko a plataporma a para iti pagsayaatan ti ilitayo a Calungonan,” inggibusen ni Antokoy iti interbio kagiddan ti panangipaarikapna iti maysa a “ninoy” iti bulsa ti reporter.

“Para meriendayo. An-anusanyo pay laeng ta imbagto la no makapagpuestotayo,” inyarasaasna iti reporter nga umaboten ti isemna iti lapayagna. Impatangarna pay ti tammudona ken  ni Antokoy a kayatna a sawen, sigurado a rummuar ti interbiona iti estasionda.

Iti umuna nga aldaw ti kampania, nasapa a rimmuar ni Antokoy. Nalawag ti rupana a nakakita nga addan dagiti postersna a nakapigket iti igid ti kalsada. Adda pay dagiti naibitin iti puon ti kayo ken poste ti koriente. Mayat man ti panagkitana iti campaign sloganna nga “Antokoy Madriaga Mapangnamnamaan agingga ken Patay.” Daytoy ti mangipakita a naalisto dagitay balsamador ti punerariana nga imbaonna.

Dimmiretso ni Antokoy iti plasa ti ili a nakaummongan dagiti tao a mapan mangsaksi iti panangiwaragawagda iti platapormada a kandidato ti ilida. Apagisu nga alas dies ti bigat idi makadanon iti covered court ti ili. Dagus a sinabat ti election officer ti ili ken ti dadaulo ti PPCRV a nangorganisar iti daytoy a panagsarita dagiti papili. Impatuldoda a dagus kenkuana ti nairanta a pagtugawanna idinto a wagis metten a wagis ti anak ti mayor kadagiti tattao a naitallaong.

Immuna a nagsarita dagiti agpaidasig a kokonsehal ken bise mayor. Adda dagiti bibo idinto nga adda met dagitay kasla bullalagaw ken agbeddabedal a sumarita a kasla damoda a basaen ti alpabeto. Iti kaadu dagiti agpaidasig a konsehal, immabot iti nasurok dua nga oras sakbay a naiwaragawag ti panagsarita dagiti para mayor.

Immuna a nagsarita ti anak ti mayor.

“Umuna unay, kablaawankayo iti naimbag a bigatyo nangruna ken ni apo balsamador,” inkita pay daytoy dagiti naruar a matana ken ni Antokoy a kasla manglais ti idiarna. Sinaggaysana nga inwaragawag dagiti kayatna a maaramid tapno agtuloy kan ti progreso nga inrugi ti amana. Maileppasto kanon ti baro a tiendaan a linumot iti panagtakem ti amana a mayor. Addanto latta nakasagana a relief goods a payless, naagub nga NFA rice, sardinas a yangs tawn, kape  a blend 45 ken brown asukar no adda dagiti sumangbay a bagyo. Awanto kan payen ti makalibas a trak dagiti ag-quarry iti igid ti baybay a kasla nalipatanna a ti amana ti makinkukua iti kompania ti konstruksion nga agal-ala iti graba iti coastal area ti ili a nangitunda iti layus itay napalabas a bagyo Pepeng.

(Maituloyto)

Comments are closed.