Footer

2 pagtaengan, dimmapo

VIGAN CITY – Pinadapo ti apuy ti dua nga antigo a balay a mapapati nga agsangagasuten ti tawenda iti Barangay Camangaan ditoy siudad iti malem ti Abril 21.

Dimmapo ti pagtaengan da Rosario Queppet, 87, ken Anacleta Farrales, 89. Naammuan nga awan ti naitaray dagiti bumalay a gargaretda.

Kinuna ni Fire Chief Inspector Floro Obrero, Fire Marshall ditoy siudad, a nakaawatda iti tawag idi ag-alas 3:45 ti malem ti Abril 21 ket dinagdagusda ti nagresponde ngem idi makagtengda iti yan ti uram, dakkelen ti apuy.

Nagsagrap ni FO3 Rey Ragon iti second degree burns  bayat ti panangdepdepda iti uram gapu iti nakaro a pudot.

Naipan ni Ragon iti Gabriela Silang General Hospital tapno mataming dagiti sugatna.

Segun ken ni Obrero, madama pay ti assessmentda no mano ti pateg dagiti dua a dimmapo a balay.

Innayonna nga agimbestigada tapno maammuan no ania ti nakagapu iti uram.

Adda saan a kumpirmado a report a personal computer ti nakaigapu iti uram.

Kadaanan a balay iti Barangay Camangaan dagiti dimmapo a pagtaengan. Kongkreto ti akimbaba a kadsaaran idinto a kayo ti maikadua a kadsaaran.#

Comments are closed.