Footer

BANNER NEWS: Ageksamen iti NLE a peke ti dokumentoda, binallaagan ti PRC

BAGUIO CITY – Imballaag ti Philippine Regulation Commission ditoy a saan a makaeksamen dagiti aplikante iti nursing examination no maduktalan a napeke dagiti dokumento nga insubmiteda iti daytoy a komision.

Inwaragawag ni PRC Regional Director Teofilo Gaius Sison, Jr. a naingeten ti panangsukimat ti ahensia nga idauluanna ti autentisidad dagiti amin a dokumento nga idatag dagiti aplikante, pakairamanan ti beripikasion kadagiti pagadalan ken ospital ken panamagdilig dagiti surat/pirma iti specimen signatures ket dagiti aplikante a maduktalan a nagidatag iti napeke a pirma ket saanen a mapalubosan nga ageksamen iti nursing examination.

Kinuna ni Sison a no nakaeksamen ti aplikante, makansela ti test papers daytoy ket no nairehistro metten a propesional, mawaswas ti sertipiko ti rehistrasion wenno lisensiana ken ma-recall ti professional IDna.

Sakbayna, idi Abril 16, tiniliw dagiti polis ditoy siudad ni Renato Moreno Borbon, mapapati nga agpekpeke kadagiti dokumento nga agop-opereyt iti Upper Mabini Street, Baguio City.

Nangiwayat dagiti police operatives iti entrapment operation nga indauluan da SPO2 Jesse dela Cruz, SPO2 Ronaldo Trinidad ken SPO1 Synzer Kapawen maikontra ken ni Borbon gapu iti complaint ti Professional Regulation Commission (PRC) ken ti Philippine Nurses Association (PNA) Cordillera Regional Council a kaadda ti maysa a tao nga agpekpeke iti pirma dagiti chief nurses kadagiti Summary of Cases.

Segun iti PRC, ti Summary of Cases ket rekord dagiti kaso a nakumpleto ti nursing student tapno makakualipika para iti Nursing Licensure Examination (NLE).

Natiliw ni Borbon nga umaw-awat iti P50 kalpasan a pinekena ti pirma ni Elena Tampican, chief nurse ti Baguio General Hospital and Medical Center. Nakakumpiska pay dagiti polis manipud ken ni Borbon kadagiti nadumaduma a peke a dokumento a pakairamanan ti diploma, transcript of records, nadumaduma a sertipiko ken agduduma a writing pens.

Segun iti PRC, ti Summary of Cases ket rekord dagiti kaso a nakumpleto ti nursing student tapno makakualipika para iti Nursing Licensure Examination (NLE).

Kinuna ni Sison nga agtultuloy ti panangmonitor ti PRC, PNA ken dagiti polis dagitoy nga illegal nga aktibidad tapno mataginayon ti integridad ti NLE.

Idi napan a tawen, naduktalan nga adda dagiti estudiante a nagisubmite iti peke a Summary of Cases a nakatuladan dagiti pirma dagiti nadumaduma a clinical instructors, clinical coordinators, nursing deans, ken chief nurses ket nadiskualipika dagitoy nga ageksamen ken naisaklangda pay iti panagpalsipika kadagiti publiko a dokumento.

Kinuna ni Sison a nasurok a 10,000 nga aplikante ti manamnama nga ageksamen iti kinanars into Hulio 2010 idinto nga indagadagna ti pannakaireport aniaman nga illegal aktibidad iti PRC Baguio Regional Office iti (074) 444-7603, 304-3080 ken 304-3180 wenno babaen ti e-mail : [email protected]#