Footer

KOMENTARIO: Ballaag ti mabbatanen a reserba ti lana iti sangalubongan

Adda metten addang dagiti sumagmamano a pagilian ken agnegnegosio iti petroleum tapno maikkan iti solusion daytoy a parikut a di masasaan a dumteng iti masakbayan. Pagarigan ti Shell, maysa a kompania nga agnegnegosio iti petroleum, pinadasna ti agbirok iti sabalin a taudan ti enerhia malaksid iti petroleum.

Ti panangminasda ti nakalawlawa a reserves ti tar-sand oil sadiay Alberta, Canada ti makitada a sungbat iti daytoy a parikut.

Ngem narugit daytoy nga oil reserves. No maminas, sigurado nga apektaranna la ketdi wenno ad-adda pay a kumaro ti mapaspasaran a global warming. Ngem agingga nga awan ti makita a sungbat iti parikut iti masakbayan, posible a daytoy makitkita a solusion ti mapidut, uray no kaipapananna ti ad-adda a pannakarugit iti atmospera a kangrunaan a makagapu iti  nakarkaro a nadagaang a panawen.

Idardarirag dagiti babassit a nasion a kas iti pagiliantayo ken dagiti dadduma pay a nasion ti kinaadda koma dagiti alternatibo nga addang inkaso a mapasaran iti masakbayan ti pagam-amkan nga ikikiddit ti tagilako a petroleum iti sanguanan ti umad-adu a pagkasapulan iti daytoy a produkto. Ita pay, dakkel a probleman ti nangato a presio ti petroleum, anianto la ketdin no dumteng ti aldaw nga awanen ti petroleum a lako iti merkado?

Isu nga ita ta nasapa pay, rumbeng laeng a maiwayaten dagiti addang tapno masulnitan dagiti pagkurangan babaen ti panangkita kadagiti alternatibo nga aramaten a pangpataray kadagiti planta, negosio ken kadagiti dadduma pay a pagnam-ayan a partuat ti kabaruanan ken moderno a teknolohia.

Ngem ti nakadakdakkel a saludsod ket no kasano iti sanguanan ti agdadata a kinapudno nga agpannuray iti petroleum dagiti amin nga ekonomia ken social system. Annugoten man dagiti agtuturay wenno saan, oil-based system amin ti ekonomia dagiti amin a pagilian. Agpannuray ti ekonomia iti lana. Kasapulan dagiti pagilian ti lana ken ti by-products daytoy a petroleum a mangpataray kadagiti planta, negosio, dagiti sasakayan kas kadagiti bus, dyip, taksi, tren, trambia ken dagiti alikamen a pinataud ti moderno a panagbiag. Naigaluten ti tao iti daytoy a produkto. Annugotenna man wenno saan, arig saanen a makaaddang no awan daytoy nga aramatenna. Sumangkautro, amin dagiti kangrunaan a pinartuatna a mangpasayaat iti panagbiagna ket agaramatda met iti daytoy a produkto. Iti itatapogna iti moderno a panagbiag, kaapiringna met ti pannakaparnuayna iti maysa pagbutbutngan a monster nga iti panagtulid ti panawen,  agbalbalinen a dakkel a problema a posible a mamaggunay dagiti pagilian a mangraut kadagiti pagilian nga addaan kadagiti reserba iti lana a kasapulanda iti pannakataginayon dagiti negosioda ken pamastrekanda.

Idi 1973, nakitatayo no kasano nga inaramat dagiti oil-producing countries daytoy a produkto tapno magun-odda ti kayatda a mapasamak.

Daytoy ti oil embargo nga impakat dagiti oil-producing countries maikontra iti USA, Canada, Germany, Great Britan, Japan,ken  Netherlands gapu iti pannakisimpatiada iti kabusbusorda a kaarruba – ti Israel.

(Maigibusto)

Comments are closed.