Footer

SALAYSAY: INDAYON NI LAGIP: Nagkurusan (Tuloyna

“Kapkapnekam kadin ti riknam kaniak?” pinerrengko ni Rodel.

“Of course!” kinuna ni Rodel. “Ngem apay a nagbalin metten a serioso ti patanganta? Umaykan ta inta agpagnapagna iti igid ti baybay.”

Timmakderkami a dua. Mayat ti apros ti pul-oy iti rupak. Kasla agar-arasaas ti baybay.

Nasabatmi da Arnel ken ni Menchu nga agsinsinnallabay nga agsublin iti beach house.

“Papananyo?” sinaludsod ni Arnel. “Saankayo nga agpukaw. Nasapa pay!”

“Agpagnapagna laeng dita, pari,” kinuna ni Rodel. “Hustonto madamdama nga ituloytayo manen ti aggiinom.”

“Dika unay agtaltalek dita kaduam,” kinuna ni Menchu. “Rapas ti ima dayta!”

“Loka, ti la masasaom, amangan no patien ni Maricel ti angawmo,” kinuna ni Arnel.

“Ania ti rapas?” sinaludsodko ken ni Rodel.

“Awan. Dimo italtalek ida. Sutil dagita.”

Nagbaybaykami a nagna iti igid ti baybay. Binay-anmi a punasen ti allon dagiti tugotmi iti kadaratan. Agum-umbi ti puyupoy kadagiti bulong ti nyog.

“Inta didiay,” kinuna ni Rodel ket inakaynak iti bahay kubo iti sirok dagiti nyog.

Nagtugawkami iti papag iti ruar ti bahay kubo. Manipud iti yanmi, ipanaw-idanon ti pul-oy dagiti garikgik dagiti agdidigos iti baybay.

Manen, immagibas iti panunotko ti nakuna ni Anna nga adda idi inkuyog ni Rodel iti beach partyda.

“Rodel, maikamanoakon a babai iti biagmo?” sinaludsodko.

“Apay a nasaludsodmo dayta?” nagkatawa ni Rodel. “Adda idi inayatko ngem saankami ngata a maikari  iti tunggal maysa ta insukatnak iti sabali. Ngem ita ta nakitakan, kapkapnekak a nabirokakon ti babai nga ikallaysak.

Iniggaman ni Rodel ti dakulapko. “Wen, siksika pay laeng ti inayatko iti amin a puso ken kararuak,” inyarasaasna.

In-inut nga inawidnak ni Rodel. Nariknak ti nabara nga angesna iti lengngesko. Diningpil ti bibigna ti bibigko. Napakidemak. Diak napupuotan ti immarakup kenkuana bayat ti panaginnagekmi.

Pagammuan, immibbetak.

“B-baka birbirokendatan,” nakunak. “Agsublitan.”

Umanges-angesak a nagbaw-ing. Ammok a no diak aramiden dayta, malipatak la ketdi ti bagik…

Naidasaren ti pangrabii iti panglawaen a panganan a tumannawag iti kabaybayan idi makadanonkami iti beach house. Naprito ken tinuno a presko nga ikan a kasla takiag ti ubing ti kadakkelda, inasar a manok, udang, ken dadduma pay a diak ammon ti klasena a masida ti pangrabiimi.

Nagpulotan laeng dagiti lallaki. Intuloyda ti nagginom iti serbesa. Uray dagiti kaduak, linuktanda ti red wine.

Pinakbuan ni Nik-Nik ti baso iti arak sana inted kaniak.

“Ne, uminomka, pagpabara,” nakunana.

Kapilitan nga inawatko ti baso. Sinimsimak. Naparupangetak ta kasla sumkad iti karabukobko.

“Kasta la iti damo,” nagkatawa ni Nik-Nik. “Ngem mayatton iti sumaruno. No nakargaankan, mapukaw dagiti inhibitionsmo. Makitamto madamdama no mabarteken dagiti kakaduata.”

Nagkuretret ti mugingko. Diak magustuan ti turongen dagiti pasamak. Agparparikna kaniak nga adda mapasamak a saan a maikanatad iti daytoy a drinking session ti grupo!

(Adda tuloyna)

Comments are closed.