Footer

SARITA: Antokoy, Kandidato para Mayor (Maikatlo a paset)

Inkari pay ti anak ti mayor a maawanto (kanon) dagiti armado a grupo dagiti politiko gapu ta surotennanto ti kuna ti Zenarosa Commission a pannakarippuog dagiti goons  idinto a nasursurok sa ngem sangapulo ti guardiana iti likud ti entablado a nakaiggem iti nasisileng a baby armalite idinto a saanda met ngarud a kameng ti PNP. Kamaudiananna, inwaragawagna a pameriendaenna amin a naitallaong apaman a malpas ti programa a nagsisipatan dagiti tao a naayat iti libre a makan.

Kasta unay ti ngirsi ti anak ti mayor a limmabas iti sango ni Antokoy idinto a permi latta ti panagwagisna kadagiti tao idi agsubli iti tugawna.

Nainayad met ti panagpasango ni Antokoy idi maawagan ti naganna. Sipapakumbaba a kimmablaaw sakbay nga inlitaniana dagiti kayatna a mapasamak iti ilida nga immabot iti makabulan nga insaganana.

“Ammotayo met a ti ilitayo a Calungonan ti paggapuan dagiti napipintas ken nalalaka a lungon. Ngarud, no mapagasatan toy numo nga agtakem kas ama daytoy nga ili, ilungalongkonto ti pannakaangay ti tinawen a Lungon Festival a pakaitanduduan dagiti produktotayo a lungon. Addanto salip iti kinnapintasan iti disenio ti lungon, kinnapaspasan a mangsangal iti lungon ken dadduma pay. Babaen itoy a parambak, umadu ti umay a turista ket kas itay kunadan, no adu ti turista, agbiag met ti adu a  negosio dagiti umili. Agayabtayto kadagiti  kameng ti media tapno umayda i-coverage ti parambak a makatulong iti panagballigi ti festival.  Tapno matagiben dagiti mapukpukawen a literaturatayo, maangayto pay ti salip iti panagdung-aw para kadagiti agtutubo tapno agtuloy dagitoy a kannawidan ni Ilokano. Kas proyektotayo para kadagiti out of school youth, makipinnirmatayo iti TESDA para iti pannakaisayangkat ti short course iti panagbalsamar. Isu a kasapulantayo ti TESDA tapno isuda ti mangsertipikar kadagiti agturpos itoy a kurso.”

Nagsardeng biit ni Antokoy tapno agnadnad ti bitlana kadagiti kalugaranna. Naulimek ti tallaong. Addan sa kapet ti bitlak, nakunana iti unegna.

Intuloyna ti bitlana: “Ditoy ayantayo, katkatawaanda ti balsamador. Ngem ibagak kadakayo, sadiay ballasiw-taaw,  dakkel ti sueldo dagiti kas kaniak a lisensiado a balamador. Agpatulongtayonto met iti DTI ken DOST para iti pannakasanay dagiti inna ti pagtaengan tapno agsursuroda nga agaramid iti kandela, agmula ken agurnos iti sabsabong tapno adda makuna a livelihood dagitoy ket makatulongda kadagiti assawada.  Iti benneg ti pannakaprotehir dagiti kabambantayan, mangisayangkattayo iti panagmula iti kaykayo tapno masukatan dagiti napukan a nausar iti panagaramid iti lungon. Itoy a wagas, malapdan ti pannakakalbo dagiti kabambantayan ken ti pannakapukaw dagiti ubbog kadagitoy. Pilientayo dagitay agro forestry a kayo nga imula tapno iti masanguanan addanto pagalaantayo iti aramidentayo manen a lungon.

Para kadagiti napanglaw nga umili, agbalinton a paset ti programa ti Municipal Social Welfare and Development Office ti panangipabulod iti lungon bayat ti massayag ken ti pannakaited ti libre a kape ken biskuit tapno maksayan ti panunoten dagiti agminatay.”

“Ne, mayat dayta a napanunotyo, Apo Antokoy!” adda nagtimek iti likudan ti ummong. Tinaliaw ni Antokoy ti nagsao ngem limned ti sumngay koma nga isemna idi mailasinna daytoy. Ni Berto a mabirbirngasan iti “ngilaw” gapu ta kutokuto dagiti pasken ken natayan, ta adda libre a kape ken tinapay para kadagiti makiminatay.

“Padasentayto met a kapatang ti simbaan tapno maikkat ti espesial a misa para iti nabaknang a natay. Kasapulan nga agpapada ti pannakatrato dagiti pumusay a napanglaw ken adda mabalinna ta kastatayo iti imatang ti Namarsua. Idawattayonto pay a saandan nga agpabayad iti pannakamisa ti minatay ta isu pay a pakalag-anan ti pamilia a nagminatay.

Dagiti volunteer barangay workers kas iti tanod, barangay health workers ken barangay nutrition scholars ket maikkanto iti libre a life insurance kas pangbigbig iti kinabannuarda iti boluntario a panagserbida iti barangayda. Mangipantayonto iti umdas a pondo para iti daytoy a proyekto.

Kamaudiananna, mangipasdektayto iti apartment type a pantion tapno masolbar ti parikut iti panagkurang ti lote iti kamposanto.

“Kunayo ngata nga adda limmukay a turnilio ti ulok kadagitoy nga imbagak ngem ipasiguradok a dagitoyto ti mamagbalin itoy ilitayo kas 1st class municipality. Diyo ngarud lipatan toy nanumo a balsamador nga anak ken kabsatyo Jose “Antokoy” Madriaga for Mayor. Mapangnamnamaan agingga ken Patay,” inggibus ni Antokoy.

(Adda tuloyna)