Footer

Tricycle driver, fish vendor, napapatay

CABUGAO, Ilocos Sur – Maysa a tricycle driver ken fish vendor ti napapatay iti nagsina nga insidente ditoy probinsia itay nabiit.

Natay da Rogelio Dimayo, 36, naasawaan, residente iti sitio Nagcaritaan, Barangay Turod Patac ditoy nga ili ken ni  Robert Collado, residente iti Barangay San Antonio, Narvacan, Ilocos Sur gapu kadagiti sugatda a gapuanan ti paltog.

Segun iti report, agdaldaliasat ti traysikel a minaneho ni Dimayo, kaduana ti inluganna a kaanakanna  idi  agarup alas 9 ti rabii iti sitio Cabaroan, Barangay Cuancabal idi pinaltogan ti di pay nabigbig a tao a nakatiruan iti uppat a daras ti biktima. Kalibre 45 ti mapapati a paltog a naaramat iti pammapatay.

Saan a naan-ano ti inluganna.

Awan pay ti maibaga a motibo ti pammapatay.

Kabayatanna, pinaltogan dagiti di pay nabigbig a tattao ni Collado bayat ti pannaturogna iti uneg ti luganna iti Barangay San Antonio, Narvacan, Ilocos Sur.

Segun iti report, gapu iti bannogna, inridep ni Collado iti uneg ti luganna nga Izuzu Elf.

Mapapati a nagsardeng ti motorsiklo a nagluganan dagiti suspetsa iti abay ti lugan ket pinaltogan ti maysa ti ulo ti biktima.

Kal. 45 met ti naaramat iti pammapatay.#

Comments are closed.