Footer

3 paltog, balbala, nakumpiska iti balay ti retired US Army man

STA. MARIA, Ilocos Sur – Nakasamsam dagiti polis kadagiti nadumaduma a nangato a kalibre nga armas iti panagsukisokda iti pagtaengan ti maysa a retirado a US Army iti Barangay Silag, ditoy nga ili idi Abril 28.

Nakakumpiska dagiti operatiba ti Criminal Investigation and Detection Group (CIDG) ken dagiti kameng ti PNP ditoy nga ili bayat ti insayangkatda a search operation iti balay ni Rudy Directo Degracia, 67, naasawaan, residente iti nadakamat a barangay, iti maysa a mini M-14 rifle,  maysa a super caliber .38 pistol, maysa a cal. 22; maysa a magasin para iti 9mm rifle ken cal. 22; 10 a magasin para iti cal. 38; 2 a magasin ti M-16 armalite; 247 a bala ti M-16 armalite; 57 a bala ti cal. 22; 37 a bala ti cal. 45; 111 balbala ti cal. 38; 4 a bala ti cal. 22; 380 kapsula ti cal. 45; ken 291 a kapsula ti cal. 38.

Mapapati a masansan ti panagpaputok ni Degracia a puon ti nagreklamoan dagiti kalugaranna.

Kabayatanna, maysa a man-nalon ti napaltogan idi Abril 30 iti bayat ti panagur-urnosna iti bulong ti tabakona iti asideg ti pugonna iti Barangay Turod, Cabugao, Ilocos Sur.

Natay a dagus ni Ramon Sonico, 44, naasawaan, residente iti nadakamat a barangay, gapu iti sugatna iti takiag ken barukongna.

Segun iti report, ur-urnosen ni Sonico ken maysa a kaduana dagiti kalluto a bulong ti tabakona iti asideg ti pugonna idi pinaltogan iti namindua a daras ti nakabonete ken nakaaruat iti nangisit a sweat shirt a tao.

Kalibre .45 ti mapapati a naaramat a paltog kas maibatay kadagiti kapsula a nasarakan dagiti polis iti nakapasamakan ti krimen.

Iti pannakaisurat daytoy, awan pay ti nainagan a suspetsa ken no ania ti motibo iti pammapatay.#