Footer

7 propesional, bogus dagiti dokumentoda

Hinokus pokus ti sumagmamano a tattao dagiti papelesda nga indatagda iti Professional Regulations Commission (PRC) tapno agbalinda a naan-anay a propesional, daytoy  ti natakuatan ti PRC itay nabiit babaen ti Online Verification of Eligibility System (OVES), maysa a paperless transaction a pakaammuan ti asinoman no pudno met laeng a lehitimo a professional ti maysa a tao kas maibasar iti agdama a listaanda. Gandat daytoy nailian a programa nga ikkaten ti panagraira dagiti bogus a propesional iti burokrasia ti gobierno ken iti pribado a sektor.

Dua dagiti natakuatan a bogus a propesional iti Cordillera idinto manipud iti Ilocos Region ken iti Cagayan Valley dagiti dadduma ket a pakaibilangan ti maysa a dietician-nutritionist, maysa a registered nurse, maysa a medical technologist, maysa a midwife ken tallo a maestra. Naikkaten dagiti naglabsing iti trabahoda ken naipilaanda payen iti kaso a falsification of public documents.

Gapu kadagitoy a  natakua-tanna, inkeddeng ti PRC nga ingetanda pay ti kampania kontra kadagiti bogus a propesional babaen ti pannakitinnulong ti Department of Labor and Employment ken ti Civil Service Commission. Naing-inget itan ti panangbusisida kadagiti amin a maisubmitar a papeles. Binallaaganda pay ti asinoman a dina koma gandaten a bogusen dagiti papelesna a kas professional ta matakuatan met laeng. No matakuatan a  bogus a professional, maikkat met laeng iti trabahona ken maidarum pay.

Inggunamgunam pay ti PRC iti gobierno ken iti pribado a paneknekanda pay nga umuna  ken usigenda a nalaing dagiti papeles dagitoy  iti OVES tapno masigurado tno lehitimo met laeng a professional dagiti aplikanteda.

Nupay adda dagiti sumagma-mano a nangbogus kadagiti papelesda a kas professional, saan koma nga isu ti rason a maikkatan ti panagtalek dagiti agpatpatrabaho iti gobierno ken iti pribado sector. Ad-adu pay laeng dagiti makabael, ken natudio a nagraduar kadagiti pagadalan.

Iti sabali a bangir, kinemmeg dagiti pannakabagi ti linteg ken ti PRC Baguio office ti maysa a lalaki a mangar-aramid kadagiti bogus a summary cases nga isubmitar dagiti nursing students tapno mapalubosanda nga ageksamen iti nurses licensure examination.  Kinemmeg dagiti nagtipon a pannakabagi ti polis Baguio ken ti PRC office ni Renato Moreno Borbon, agedad iti 47, taga-Sampaloc, Manila ngem agnanaed iti Middle Rock Quarry idi malem ti Abril 16 iti Genesis Copy Center sadiay Upper Mabini Street.

Kuna ti PRC a maysa met laeng a professional ti nagreklamo iti opisinada gapu iti mapaspasamak a falsification of public documents. Kapada met laeng ti reklamo ti complaint ti Cordillera Council of the Philippine Nurses Association. Gapu itoy, nagtignay a dagus ti PRC, ket natakuatanda a nagadu dagiti nakapila tapno maproseso dagiti bogus a summary casesda. Nagpatulong iti polis ti PRC ket naaramid ti entrapment operation a nakakemmegan ni Borbon. Nairaman a binogbogus ni Borbon ti pirma dagiti chief nurses kadagiti nadumaduma nga ospital iti Baguio ken kabangibangna.

Gapu itoy a kaso, nakarkaro manen ti pananginget ti PRC office Baguio ken ti satellite officena iti San Fernando, La  Union kadagiti amin nga agaplay iti nursing licensure examination. Aglalo ket idi kallabes, nakatakuatda iti sangapulo a nangbogus kadagiti papelesda nga insubmitarda iti PRC. Saanen a napalubosan dagitoy nga ageksamen iti licensure exa-mination.

Nagballaag pay ti PRC a  maibabawi ti lisensia ken maidarum ti asinoman a matakuatan a nangbogus kadagiti papelesda.

Agserbi koma a pagpampanunotan dagiti dadduma daytoy.#