Footer

BANNER NEWS: Taraken a tilapia kadagiti fish cages iti Caoayan, Vigan, nagpatay

CAOAYAN, Ilocos Sur -Masuspetsa a ti rugit a timmapuak iti karayan Mestizo ti nakaigapu iti panagpatay dagiti lames kadagiti fish cages a masarakan iti karayan a sakup ti Barangay Tamag ti siudad ti Vigan ken Barangay Don Lorenzo ditoy nga ili.

Segun ken ni Ariston Bañez  Jr., presidente ti Fishermen’s Association ti Don Lorenzo,  natakuatanda laengen a timpaw dagiti tarakenda a lames idi Abril 28 ket suspetsada a ti panagtudona idi kanikadua nga aldaw ti nakagapu iti panagpatayda.

Naduktalan met dagiti adda fish cagesna iti karayan Mestizo a sakup ti Barangay Tamag ti panagpatay dagiti tarakenda a tilapia. Ti narugit a danum a mapapati a timmapuak iti karayan manipud kadagiti kanal ti suspetsa a nangpataud iti fish kill.

Sabali pay a maitudtudo a gapu ti kinapudot ti panawen gapu iti mapaspasaran nga El Nino phenomenon.

Ngem adda alegasion a maysa a nakagapu iti panagpatay dagiti tilapia ditoy nga ili dagiti mapapati nga ag-agas a naiyanud iti karayan gapu iti panagtudona.

Kinuna ni Bañez a dakkel ti pukawda iti panagpatay dagiti tarakenda a tilapia iti nasurok sangapulo a fish cages ditoy nga ili agsipud ta dandanidan maapit.

Kinuna ni Bañez a nakasaganan a mailako dagiti tarakenda a tilapia iti panagpiesta ti Vigan inton Mayo 3.

Kanaig daytoy, dimmawat ni Bañez iti tulong ti munisipio tapno masulnitan ti pukawda.

Mapattapatta nga agdagup iti P300,000 ti pateg dagiti nagpatay a lames ngem mabalin a dakdakkel pay no mairaman dagiti naapektaran a a fish cages iti pasetna ti Barangay Tamag iti Vigan City. Aganay a tallupulo amin dagiti fish cages iti karayan Mestizo.

Idi naidanon ti report ken ni Gov. Deogracias Victor Savellano, kinunana nga adda existing a programa ti gobierno provincial a nakasagana a mangted iti fingerlings kadagiti mangngalap a nagpatay ti tarakenda a tilapia.

Kinuna ni Bañez a sinurotda met amin dagiti naadalda iti seminar mainaig iti panagtaraken iti lames babaen ti fish cage ken saan a sobra ti bilang dagiti tilapia nga inkabilda tunggal fish cage.

Naidanonen ti napasamak iti Bureau of Fisheries and Aquatic Resources (BFAR) ket nangisayangkat metten daytoy iti panagimbestiga.

Iti pannakaisurat daytoy, awan pay ti report ti nasao nga ahensia no ania ti nakaigapu iti panagpatay dagiti tilapia.

Kabayatanna, naireport nga adda met fish kill iti Barangay Tamurong ken Paratong iti ili a Santa Catalina.

Naammuan nga imbilinen ni Municipal Agriculture Officer Nereo Recaido ti pannakaimbestiga ti report no agpayso.#

Comments are closed.