Footer

SALAYSAY: INDAYON NI LAGIP: Nagkurusan (Tuloyna)

Umadalemen ti rabii ngem nagtuloy latta ti panagginom dagiti kakaduak. Nakapamimpat metten a kopita ti inyawat ni Menchu kaniak nga inumek. Ngem inlibasko nga impattog iti likudak.  Bassit laeng ti ininomko ngem nakalablabbagan ti rupak. Nupay kasta, nasimbeng pay laeng ti panunotko. Diak kayat a mabartekak.

Insingasing ni Arnel ti ipapanmi iti igid ti baybay. Nakipatang iti maysa nga agindeg ket nagpaitulod iti pagtungo. Dagitoy ti pinagtutuonmi sami sinungrodan. Madamdama, dimmarangen dagiti kayo.

Pinagtokar ni Arnel ti portable nga MP3na. Pimmalallailang ti garampang a tokar.

Linawlawmi ti apuy. Pares-pares. Idi maibbus ti sangakahon a serbesa, nagpaala manen ni Arnel.

Nasiputak nga adda ilalaokda iti inumenda a kasla tableta. Uray dagiti kaduak a babbai, uminomda metten iti serbesa.

Inyopresarandak ngem nagkitakitak. Suspetsak a pagparugso ti ilalaokda iti inumenda.

Apo Dios, ania daytoy naserserrekko? nakunak iti nakemko.

Pagammuan, timmakder ni Nik-Nik ket rinugianna ti naglung-ay iti sanguanan ti boy friendna. Agkatkatawa a nangpatakder kenkuana. Inlagidlagid ni Niknik ti bagina iti bagi ti boy friend sa agkatawa nga umadayo no panggep daytoy nga arakupen.

“Awan, dika makakemmeg gayam, lakay!” inkantiaw dagiti lallaki.

Kasla namagneto ti matak ken ni Nik-Nik. Kasla diak patien a kastoy ti garaw ni Nik-Nik ita ta nakainomen. Awanen ti inhibition kenkuana. Nagpukawen ti bainna. Siguraduek a ti inlaokda a tableta iti inumenda ti makagapu.

Natukmaan ti kaparehana ni Nik-Nik ket inarakupna bayat a kinumpasanda ti tokar. Ad-adda itan ti durog dagiti kakaduami.

“Sige, make the night hot, bebi!” inlaaw ni Rodel. Nariknak ti dakulapna a naipatay iti luppok. Diak intaltalek idi damo ngem idi mangrugi nga agdakiwas, inwalinko ti dakulapna.

“Ops, nakidiaske a dakulap ta sabali metten ti pagdakiwasanna,” inggarakgak ni Rodel.

Kimmayakayak.

Iti sanguananmi, pumarpardas itan ti panagkuti ti patong ni Nik-Nik iti panangkumpasna iti pumarparagsit a tokar.

Madin ti agparparikna kaniak. Saanen nga ordinario laengen a beach party daytoy nakailaw-anak – maysan a sex orgy!

Iti masikigak, saanen nga agbuybuya dagiti kakaduak. Aggiinnarakupen ken aggiinnagekdan.

Agkatkatawa ni Nik-Nik a rimmuar iti ummong ket nagtaray nga agturong iti baybay. Kinamat ti bfna. Nangegmi ti panagikkis ni Nik-Nik, sa simmaruno ti panaggarikgikna. Madamdama, awanen ti mangegmi.

Kasla daytan ti signal a timmakder dagiti kakaduak ket tinukmaanda dagiti kaparehada. Pares-pares dagitoy nga inalimon ti kasipngetan. No napananda, daytan ti diak ammo.

Nabatikami ken ni Rodel. “Uminomta pay,” kinunana.

“N-napananen dagiti kakaduata?”

“Iti daytoy a kanito, bukbukoddan ti lubong!” kinuna ni Rodel. “Duata laengen a nabati. Bukodanta metten ti lubongta!”

(Maigibusto)