Footer

SARITA: Antokoy, Kandidato para Mayor (Maikapat a paset)

“BOSS, adda parikut,” agan-anangsab  ti campaign manager ni Antokoy iti dayta a malem a panaggapuna a nagronda kadagiti barangay iti daya ti ili. Ditoy ti ayan dagitay agar-aramid iti lungon.

“Apay, Batongol?” imamad ni Antokoy a madama a mangsirsirig iti dakkel a tarpaulin a naibitin iti sango ti balayna a pinagbalinna a headquartersna bayat ti kampania.

“Kua, boss, nagpainum ni Mayor Pallot  kadagiti barangay iti daya sana pinaikkat dagiti postersmo. Tunggal poster a naidatag, sinuktanna iti tallo’t ulona,” insalaysay ni Batongol.

“Ania?” napasanamtek ti Antokoy iti dayta a naammuanna. Urayna la nakagat ti makinbaba a bibigna.

“Ken inwaragawagna a mangted iti agduduma a ramit ti allawagi tapno adda usarenda  iti panggedanda, kasukat ti panangibutosda iti anakna, boss,” impasaksak manen ti campaign manager.

“Saanen a patas ti laban, Batongol. Dadaelendatayo metten kadagiti tao!”

“Talaga a kasta, boss. Agasem ta kuna ti Mayor a ti natay laeng ti paglaingam ket amangan no balsamaremto ti ili no sika ti agtugaw a mayor,” kinuna ni Batongol.

“Saan a mabalin daytoy. Masapul nga agkutiak,” kinuna ni Antokoy iti unegna.

“Ala, inka pay agmerienda dita uneg, Batongol, ta agpatangta no madamdama no ania ti nasayaat nga aramidenta iti dayta indanonmo a parikut,” immandarna ket kasla naawanan iti pigsa a nagpusot iti maysa kadagiti tugaw iti paraangan.

Napasennaay ni Antokoy iti nauneg. Talaga nga aramiden ti mayor ti amin a pamuspusan tapno ti anakna ti mangabak. Numona ta asidegen ti aldaw ti eleksion. No agtultuloy ti ar-aramiden ti mayor sigurado a mabati isuna iti tengnga ti dalan. Ita a maamirisna a saan laeng a kualipikasion ti kasapulan iti dangadang ti politika. Masapul met ti estratehia tapno masaganaan dagiti di mapakpakadaan a pagteng a kas itoy indanon ni Batongol kenkuana. Dina koma kayat nga ibaga ti kinapudno, dagiti dakes a kababalin dagiti kabalubalna ngem saan met a mabalin nga agulimek lattan idinto a makaadun ti kasupangetna.

Inkeddengna a paayabanna ni Pakol tapno isu ti agbalin a pannakangiwatna iti nabukelna a plano.

Ni Pakol ti sigud a ghost writer ti agdama a mayor. Ngem manipud idi saan a ginaranturan ni Mayor Pallot idi mapan umutang iti feeds a pagpakanna kadagiti tarakenna a takong ken bula, immayen immapon kaniana. Inestoriana dagiti palimed ti sigud nga amona.

Ita a masubokna no talaga a kaduana daytoy wenno pakawala laeng ti mayor. Nadamdamagna ngaminen a kasla tay bunga ti daligan daytoy. Kaduana ti asinoman a makaipaay kenkuana iti grasia.

“Saannak met ngata nga allilawen,” nakuna ni Antokoy iti bagina a ni Pakol ti kayatna a sawen.

“Inka tuntonen ni Pakol ket ibagam nga umay a dagus ditoy ayanko,” immandar  ni Antokoy apaman a rimmuar ni Batongol manipud iti uneg ti headquarters. “Ikanayonmo metten nga ayaban dagitay tusong twosome. Ibagam nga im-imbitarak ida iti maysa a pangrabii. Inkan, darsem!”

Ilatakna iti tusong twosome a mediamen dagiti palimed dagiti agama a kasalipna iti pulitika. Di balen a pasukibannanto dagitoy iti medio nabengbeng a sobre tapno sigurado ti panangipadamagda  iti estoriana.

Nagngirsi ni Antokoy. Kitaek man ti laingyo nga agsarapa iti daytoy nga ibutaktakko! nakunana iti uneg.

(Adda tuloyna)

Comments are closed.