Footer

Task force nabilin nga agimbestiga mainaig pannakapapatay pastor

SAN FERNANDO CITY – Imbilin ti PNP regional director ditoy ti panangiwayat ti nabukel a task force iti naun-uneg nga inbestigasion mainaig ti pannakapapatay Union idi Abril 24 ti tallo a tattao a pakairamanan ti maysa a pastor iti Barangay Suyo, Bagulin, La.

Maysa a case conference ti inangay ni Police Chief Supt. Constante D. Azares, Jr., regional director, a tinabunuan dagiti amin a kameng ti Special  Investigation Task Group (SITG) Estacio nga indauluan ni Police Senior Supt. Ireneo O. Inal ti Criminal Investigation and Detection Group (CIDG), ken dagiti police officials ti La Union nga indauluan ni Police Senior Supt. Noli G. Taliño, assistant commander ti nasao a task force, tapno kitaenda ti amin nga anggulo iti panagtambang.

Nagudas iti pannambang da Herminio Estacio, 55, naasawaan, maysa a Born-Again a pastor; ti anakna a ni Glenn, 31, naasawaan; ken ti katulongda a ni Elizabeth Q. Laongan, 18, balasang, residenteda amin iti Barangay Cambaly, Bagulin, La Union.

Nagsagrap kadagiti sugat ni Raquel, 51, asawa ti pastor, ket intaray dagiti nagresponde a polis iti Bethany Hospital ditoy siudad.

Iti inisial nga inbestigasion dagiti polis, nakalugan dagiti biktima iti maroon a Nissan 4×4 pick-up idi tinambang ida dagiti armado a tattao a nakabonete iti agsalog a kalsada iti Suyo-Cambaly iti Bagulin iti agarup 7:40 ti bigat ti Abril 24.

Nakarekobre dagiti inbestigador iti sangapulo ket innem (16) nga M16 live ammunition, 3 M16 empty shells, 1 a long M16 magazine, 5 dud ammunition para caliber 7.62/M-14 nga addaan iti firing pin marks iti primersda, 2 7.62mm/M14 empty shells,  1 nga improvised explosive device (molotov/incendiary), 1 a red cylinder-shaped bag a naglaon kadagiti botelia ti  mineral water, ken maysa a nangisit a sinelas.

Kanaig daytoy, imbilin ni Azares ti pannakabantay ni Estacio 24/7 babaen dagiti police security escorts.

“Daytoy tapno masigurado ti seguridad ni Mrs. Estacio agsipud ta isu ti testigotayo ken kitkitaentayo amin nga anggulo tapno maammuan ti motibo iti panagtambang,” kinuna ni Azares.

Inlugar met ni Taliño iti heightened alert ti intero a La Union police force nangruna iti Bagulin ken kaarrubana nga il-ili para iti naing-inget a hot pursuit operation kadagiti nagtambang.#

Comments are closed.