Footer

Viva Vigan Festival of the Arts, panangtaldiap iti tawid, kultura ken identidad ni Bigueño

VIGAN CITY — Makuna a naun-uneg ti  kaipapanan ken ni Mayor Eva Marie Singson-Medina ti panangrambak daytoy a siudad ita a tawen iti Viva Vigan “Binatbatan” Festival of the Arts a nangrugi itay Abril 30 ken agpatingga iti Mayo 5.

Umuna, itay laeng nabiit, sabali manen a pammadayaw ti naawat ti Vigan City – ti Presidential Award kas Most Child-Friendly Component City iti pagilian.

Maikadua, mailayon ni Medina a chief executive daytoy a siudad nga awan ti kinabalubalna, maysa a banag a di pay napasamak iti pakasaritaan daytoy sipud pay idi maysa pay laeng nga ili ken uray idin nagbalin a siudad idi 2001.

Idi Abril 22 daytoy a tawen, kas gunggona ti pannakapili ti Vigan City a Most Child-Friendly Component City iti pagilian, inawat ni Medina ti tropeo ken P300,000 manipud ken ni Pres. Gloria Macapagal-Arroyo iti seremonia a naangay iti Heroes’ Hall ti Malakaniang.

Iti panangiyalatna iti pammadayaw iti maikadua a gundaway, imbalat ti Vigan City dagiti kinasalipna a pakairamanan ti  Tagaytay City, Dumaguety City ken Dipolog City.

Uray idi agtaray manen ni Medina a para mayor idi 2007 (naginana kalpasan ti pannakaungpotna iti maikatlo a terminona kas mayor), awan ti simmango kenkuana. Maibilang daytoy nga umuna ditoy lugar a maibilang a sentro ti katolisismo iti amianan ti Manila. Ti kaawan ti simmango manen kenkuana iti daytoy nga eleksion ti nangpatalged iti kinabanglona kas politiko ditoy siudad ken panagraem dagiti umili kenkuana iti panamagluposna iti Vigan manipud iti ordinario nga ili ket nagbalin a naprogreso ken kangrunaan a destinasion dagiti turista iti Amianan.

Nupay nairana ti pannakarambak ti Viva Vigan “Binatbatan” Festival sakbay ti eleksion, masigurado latta ti panagdudupudop ditoy dagiti turista, lokal man wenno ganggannaet, tapno umayda makipagrambak kadagiti nadumaduma nga aktibidad a mangitampok iti nabaknang a kultura daytoy a siudad a maikatlo a kaduogan iti sapasap a pagilian, sumaruno iti Cebu ken Manila.

Dagiti sumaganad dagiti nadumaduma nga aktibidad iti makalawas a parambak: April 30 – Zarzuela a napauluan “Walang Sugat; May 1 – pannakalukat dagiti exhibits, Carabao Painting and Boklan Art’s Contests, libre a panagbakuna dagiti aso iti kontra rabies, ken Heritage Singing Idol; May 2 – Tarayem Fun Run, Beach Volleyball, Bankathon, Binatbatan Street Dancing Contest and Showdown;  May 3 – Misa iti Simbaan ni Apo Lakay; Kalesa Parade and Contest; Santacruzan ken Disco sa Kalye; May 4 – The Traditional Games, Gay Parade and Cultural Show; May 5 –  Abel – house décor contest, basketball exhibition of Gays.

Maysa a pakaigidiatan ti Binatbatan Festival kadagiti maisaysayangkat kadagiti sabali a probinsia ti pannakaidaddaduma ti nabaknang a historia, tawid, ken kultura ti siudad – maysa a panangtaldiap iti namaris a paset ti napalabas a maipagpannakkel ni Bigueño, sadino man ti ayanna.#