Footer

14 ili, maikkan subsidy iti certified seeds

VIGAN CITY – Sangapulo ket uppat laengen nga nga ili ditoy probinsia ti maikkan iti subsidy iti certified seeds, daytoy ti naammuan ti Tawid News Magasin itay nabiit.

Pinasingkedan ti maysa nga opisial ti Department of Agriculture ditoy probinsia, a 14 laengen nga ili ti maikkan iti certified seeds subsidy maigapu ta nangato ti produksion ti irik iti rehion iti napalabas a panagtatalon.

Iti interbio ni Provincial Agriculture Officer Teofilo Quintal iti reporter ti DWRS, kinunana a gapu iti nangato a produksion ti irik iti Rehion I iti naglabas a tawen, imbes a sapasap a probinsia ti benepisario iti GMA Rice  Program ti national government ken ti Department of Agriculture, nagbalin laengen a 14 nga ili ti manamnama nga umawat iti subsidy ti certified seeds.

Nairusat ti subsidy ti certified seeds manipud ti GMA Rice Program ti national government ken ti Department of Agriculture a maited kadagiti LGUs kas pangtulong kadagiti mannalon.

Iti napalabas, 32 nga ili ken dua a siudad ti benepisario iti daytoy a programa ti national government ken ti DA.

Karaman dagiti maikkan pay laeng iti subsidy ti ili ti Bantay, Caoayan, Magsingal, San Vicente, Sinait, Vigan City, Alilem, Del Pilar, Lidlidda, Quirino, Sigay, Sugpon, Suyo ken Salcedo.

Babaen ti nasao a subsidy, 50% ti ibaklay ti LGU ken ti national government idinto a 50% met ti resipiente a mannalon.

Agpateg iti P1,200 ti maysa a sako ti certified seeds, isu a P600 laengen ti mabusbos ti mannalon no gumatang ta ibaklay met ti LGU ken ti national government ti P600.00.#